Aldın xabar berilgenindey, Qaraqalpaqstan Respublikası Joqarǵı Keńesiniń Baslıǵı A.Orınbaevtıń basshılıǵındaǵı Qaraqalpaqstan delegaciyasınıń Ámirliklerge saparı dawam etip, Qaraqalpaqstan delegaciyası ENOC (Emirates National Oil Company) Bas atqarıwshı direktorı Saif Al Falasi menen ushırastı.

Onda Joqarǵı Keńes Baslıǵı sońǵı jıllarda Prezidentimizdiń itibarı menen respublikamızda investiciya ortalıǵın jaqsılaw, isbilermenlerge qolaylıqlar jaratıw boyınsha jaratılǵan imkaniyatlar, Qaraqalpaqstannıń ekonomikalıq, transport-logistika hám resurs potencialı haqqında keń túrde maǵlıwmat berdi.
Ushırasıwda kompaniya menen mámleketlik-jeke sheriklik tiykarında birge islesiwdi jolǵa qoyıw, stacionar hám mobil túrde elektrostanciyalar qurıw hám olardı Elink sanlı sistemasına baylanıstırıw arqalı oraylıq basqarıwdı jolǵa qoyıw, servis xızmetlerin shólkemlestiriw boyınsha sóylesiwler alıp barıldı.
Bunnan soń, 50 den aslam mámlekette jumıs alıp barıp atırǵan Shorlanıw sharayatında biodiyqanshılıq xalıqaralıq orayı (ICBA) basshıları menen ushırasıw ótkerildi.
Onda oraydıń suwdı únemlewshi texnologiyalar, shorlanǵan jerlerdi tiklew, agrotexnikalıq innovaciyalar, sanlastırılǵan diyqanshılıq hám ıssıxana sheshimleri tarawındaǵı jumısları jáne genetikalıq izertlewler, jas qánigeler tayarlaw sıyaqlı jumıs baǵdarları boyınsha pikirlesildi.
Sonday-aq, ICBA menen birgelikte Qaraqalpaqstanda qospa ilimiy-izertlew orayın shólkemlestiriw, sonıń menen birge, shorlanıwǵa qarsı gúresiw boyınsha xalıqaralıq grantlardı tartıw imkaniyatları keńnen dodalandı.
Sapar dawamında Joqarǵı Keńes Baslıǵı basshılıǵındaǵı Qaraqalpaqstan delegaciyası Envirol kompaniyası wákilleri menen de ushırastı.
Onda kompaniyanıń shıǵındılardı qayta islew, sanlı texnologiyalardı en jaydırıw hám basqa da baǵdarlardaǵı tájiriybege iye ekenligi atap ótilip, Qaraqalpaqstanda mámleketlik-jeke menshik sheriklik tiykarında kanalizaciya sistemaların modernizaciyalaw, sanaat joybarları ústinde birge islesiw boyınsha pikirlesildi.
Ushırasıwlar dawamında Qaraqalpaqstan delegaciyası hám xalıqaralıq sherikler arasında, sonıń shinde BAÁniń Bell Engineering Software Technologists hám FAMESA Chemical FZE (Owned by CADEX Group), Bell Engineering Software Technologists hám Amsterdam Clinic, Bell Engineering Software Technologists and PetroSole Oil Field Services kompaniyaları menen ulıwma bahası 660 mln. dollar bolǵan kelisimlerge qol qoyıw máresimi ótkerildi.
Qaraqalpaqstan Respublikası Joqarǵı Kenesiniń Baslıǵı A.Orınbaevtıń basshılıǵındaǵı Qaraqalpaqstan delegaciyası Ras-al-Xayma Ámiri Shayx Saud bin Sakr Al Qosimiy menen ushırastı.
Onda Qaraqalpaqstannıń jańa investiciyalıq joybarlardı ámelge asırıw baǵdarındaǵı hám ekonomikalıq potencialı, ózine tán geografiyalıq jaylasıwı, turizm, awıl xojalıǵı hám sanaat tarawındaǵı imkaniyatları atap ótildi. Ózbekstan, sonıń ishinde, Qaraqalpaqstannıń awıl xojalıǵı ónimlerine ayrıqsha qızıǵıwshılıq bildirilip, Qaraqalpaqstanda bul ónimlerdi jetistiriw hám jetkerip beriw boyınsha turaqlı birge islesiwdi jolǵa qoyıw máseleleri talqılandı.
Bunnan soń, dúnya júzi boyınsha iri keramika hám santexnika ónimlerin islep shıǵarıwshılardan biri esaplanǵan RAK Ceramics kompaniyası basshıları menen ushırasıw ótkerildi.
Dáslep kompaniya pavilonında islep shıǵarılıp atırǵan ónimler – keramikalıq plitkalar, sanfayans, mozaika, interer hám eksterer ushın sheshimler, shiyki zattan tayar ónimlerge shekemgi tolıq kommerciyalıq liniya kórip shıǵıldı. Sonday-aq, lokalizaciyalastırılǵan keramikalıq ónimler hám qurılıs materialların islep shıǵarıw boyınsha joybarlardı ámelge asırıw máseleleri talqılandı.
Sapar sheńberinde «ASR RENT A CAR» kompaniyası wákilleri menen ushırasıw ótkerilip, birgelikte joybarlardı ámelge asırıw máseleleri dodalandı.
Kompaniya wákilleri menen Qaraqalpaqstan Respublikasında 43 mln. dollarlıq investiciya qarjıları tiykarında Monobloklar islep shıǵarıw joybarın islep shıǵıw boyınsha kelisimge erisildi hám shártnamaǵa qol qoyıldı.
Ulıwma ashıq hám konstruktivlik ruwxta ótkerilgen ushırasıwlarda tárepler óz-ara birge islesiw, imkaniyatlardan nátiyjeli paydalanıp, áhmiyetli joybarlar ústinde sheriklik qatnasıqların ornatıw boyınsha kelisip aldı. 20 ǵa shamalas sırt el kompaniyaları menen 100 mln. dollarlıq eksport boyınsha shártnamalarǵa qol qoyıw boyınsha kelisimlerge erisildi.

Qaraqalpaqstan xabar agentligi.