2024-2025-oqıw jılı juwmaǵında Qaraqalpaqstan Respublikasında Mektepke shekemgi hám mektep bilimlendiriwi ministrligine qaraslı 726 mektep, Prezident mektebi, I.Yusupov dóretiwshilik mektebi hám 18 qánigelestirilgen mekteplerin 25 798 oqıwshı pitkerip shıqpaqta. Olardıń arasında 537 pitkeriwshi “Altın”, 179 pitkeriwshi “Gúmis” medalǵa usınıs etilgeni – mektep bilimlendiriwi sistemasındaǵı pidayı ustazlarımızdıń miynetiniń nátiyjesi bolıp esaplanadı.

«Ilim – eń ullı maqtanısh» súreni astında ótkerilip atırǵan mádeniy ilajlardıń dawamı «PITKERIWSHI PARTY» ataması menen Nókis qalasındaǵı Doslıq kanalı boyında bolıp ótti.
Jaslar maydanshasında ótkerilgen bayram keshesine Qaraqalpaqstan Respublikası Joqarǵı Keńes Baslıǵı Amanbay Orınbaev qatnastı hám pitkeriwshi jaslardı ómirindegi eń bir umıtılmas kún esaplanǵan «Sońǵı qońıraw» keshesi menen qızǵın qutlıqlap, olardı keleshekte elimiz ushın ayanbay xızmet etetuǵın tereń bilimli, pidayı insanlar bolıp jetilisiwine tilekleslik bildirdi.
Ilajda respublikamız basshısı tárepinen Ózbekstan Respublikası Prezidentiniń basshılıǵında elimizde ámelge asırılıp atırǵan reformalar nátiyjesinde jaslardı qollap-quwatlaw boyınsha bir qatar nızam, párman hám qararlar qabıl etilgen, ásirese, Prezidentimiz tárepinen qabıl etilgen 213-sanlı tariyxıy párman menen qaraqalpaqstanlı jaslarǵa qaratılıp atırǵan ayrıqsha itibar nátiyjesinde hár jılı qosımsha kvotalar ajıratılıp atırǵanı kewillerge ayrıqsha maqtanısh sezimlerin baǵıshlap atırǵanı atap ótildi.
Pitkeriw keshesi kóterińki ruwxta koncert baǵdarlaması menen dawam etip, jaslarımız sheksiz quwanıshqa bólendi.

Adilbay Orazov,
Qaraqalpaqstan xabar agentligi sholıwshısı.