Mektepti pitkerip jańa turmısqa qanat qaǵıp atırǵan bıyılǵı qarlıǵashlar ushın da sońǵı qońıraw qaǵılıp, pitkeriwshi jaslardı úlken ómirge qaray uzatıp saldı.

Nókis qalasındaǵı 31-sanlı ulıwma bilim beriw mektebinde de “Ilim eń ullı maqtanısh!” súreni astında “Sońǵı qońıraw” ilajı kóterińkilik ruwxta bolıp ótti.
Onda bilimlendiriw tarawınıń juwapkerleri menen birgelikte, Bajıxana basqarmasınıń juwapker basshıları da qatnasıp, oqıwshı jaslardı bayram menen qutlıqladı.
Mektep oqıwshıların watansúyiwshilik ruwxında tárbiyalaw hám jas áwladtı hár tárepleme bárkamal etip kamalǵa keltiriwdegi biyǵárez xızmetleri ushın bir topar bilimlendiriw tarawı wákillerine Qaraqalpaqstan Respublikası Bajıxana basqarması atınan “Alǵısnama” járiyalandı.
Bul mektepte shólkemlestirilgen “Jas bajıxanashı” dógeregi jıl dawamında óz jumısın jedellik penen alıp barıp, oqıwshılardı bajıxana tarawı menen jaqınnan tanıstırdı.
Bayram ilajı dawamında jıl dawamında usı dógerek sheńberinde ótkerilgen teoriyalıq hám ámeliy sabaqlarda belsene qatnasqan, sonday-aq, shólkemlestirilgen jarıslarda jeńimpazlıqtı qolǵa kirgizgen 7 oqıwshı bajıxana komiteti tárepinen shólkemlestirilgen “Jas bajıxanashı” kókirek belgisi menen sıylıqlandı.
Ilim orayı esaplanǵan mektepten alǵan tálim-tárbiya jaslardıń keleshekte óz ornın tabıwında tayanısh wazıypasın atqaratuǵınlıǵına isenemiz.

Qaraqalpaqstan xabar agentligi.