Búgin elimizdiń barlıq aymaqlarında «Sońǵı qońıraw” sesti jańlap, pitkeriwshi jaslar ana-Mektepleri, miyirman ustazları menen xoshlaspaqta.  Bul kún – bilim dúnyasına birinshi qádem taslaǵan baslawısh klass oqıwshıları ushın jańa basqıshtıń baslanıwı, 11-klass pitkeriwshileri ushın bolsa úlken turmısqa alıp barıwshı esik bolıp esaplanadı.

Sonıń ishinde, 2024-2025-oqıw jılı juwmaǵında Qaraqalpaqstan Respublikasında Mektepke shekemgi hám mektep bilimlendiriwi ministrligine qaraslı 726 mektep, Prezident mektebi, I.Yusupov dóretiwshilik mektebi hám 18 qánigelestirilgen mekteplerin 25 798 oqıwshı pitkerip shıqpaqta. Olardıń arasında 537 pitkeriwshi “Altın” medal, 179 pitkeriwshi bolsa “Gúmis” medalǵa usınıs etilgeni – xalıq bilimlendiriw sistemasındaǵı pidayı ustazlarımızdıń miynetiniń nátiyjesi bolıp esaplanadı.

Nókis qalasındaǵı 1-sanlı mektepte «Ilim – eń ullı maqtanısh» súreni astında sońǵı qońıraw ilajı bolıp ótti.

Saltanatlı ilajǵa Qaraqalpaqstan Respublikası Joqarǵı Keńesi Baslıǵınıń orınbasarı Rustam Saparbaev qatnastı hám qatnasıwshılarǵa Ózbekstan Respublikası Prezidentiniń pitkeriwshi ul-qızlarǵa jollaǵan qutlıqlawın oqıp esittirdi hám mektep pitkeriwshilerin qutlıqladı.

Ótkerilgen ilajda Prezidentimiz tárepinen elimizdiń keleshegi bolǵan jaslarǵa qaratılıp atırǵan itibar hám imkaniyatlar atap ótilip, bul imkaniyatlar tiykarında kóplegen jaslar ózleriniń talant hám uqıplılıǵın júzege shıǵarıp atırǵanı hám kóplegen jetiskenliklerge erisip kiyatırǵanlıǵı sóz etildi.

Bunnan soń óz teńlesleri arasında ayrıqsha qábileti, bilimi hám úlgili minez-qulqı menen kózge túsken oqıwshılar, olardıń ata-anaları hám bilim bergen ustazlarına minnetdarshılıq bildirildi.

-Bıyılǵı jılı respublikamızda jaylasqan mekteplerden 46 pitkeriwshi student bolıw baxtına miyasar boldı, -deydi Qaraqalpaqstan Respublikası Mektepke shekemgi hám mektep bilimlendiriwi ministri Gúlistan Qojabaeva.- Olardıń 15i sırt eldegi abıraylı joqarı bilimlendiriw mákemelerine múddetinen aldın oqıwǵa qabıl etildi. Bul bolsa jaslarımızdıń bilimge qushtarlıǵı, izleniwsheńligi hám joqarı maqsetlerge qaray isenimli umtılıp atırǵanınan dárek beredi.

Ilaj bayram saltanatı menen dawam etti.

Qaraqalpaqstan xabar agentligi