Ózbekstan Respublikası Milliy gvardiyasınıń Tashkent Temurbekler mektebinde Milliy gvardiya, Mektepke shekemgi hám mektep bilimlendiriwi ministrligi, Jaslar isleri agentligi hám Jaslar awqamı Oraylıq Keńesiniń shólkemlestiriwi menen «Jas gvardiyashı» áskeriy-sport jarısı bolıp ótti.
Jarısqa elimizdiń barlıq aymaqlarınan 16 komanda qatnasıp, úsh kún dawamında 10 shárt boyınsha óz-ara bellesti hám respublikamız atınan qatnasqan Tórtkúl rayonındaǵı 18-sanlı mekteptiń komandası sıylı ekinshi orındı jeńip alıwǵa miyasar boldı.
Qatnasıwshılardı bir maqset jolında birlestirgen bul áskeriy-sport jarısında Samarqand wálayatınıń Kattaqorǵan qalasınan kelgen 11-sanlı mektep komandası birinshi, Tashkent qalası CHilanzar rayonındaǵı 168-sanlı mektep komandası úshinshi orındı iyelewge miyasar boldı.
Jarısta jeńimpaz bolǵan komandalardı sıylıqlawǵa baǵıshlanǵan saltanatlı máresimge,
Milliy gvardiya sárkardası general-mayor R.Djuraev, Ózbekstan Respublikası Mektepke shekemgi hám mektep bilimlendiriwi ministriniń orınbasarı F.Bakiev, Ózbekstan Jaslar isleri agentliginiń direktorı A.Sadullaev hám Ózbekstan Jaslar awqamı Oraylıq keńesiniń baslıǵı X.Sattarovlar qatnasıp, oqıwshılardı usı ilajda tabıslı qatnasqanı ushın qutlıqlap, jeńimpazlarǵa diplom, medal, bahalı sawǵalardı tapsırdı hám túrli nominaciyalar boyınsha da komanda sárdarları múnásip xoshametlendi.
Qaraqalpaqstan xabar agentligi