Ukraina jetekshisi Vladimir Zelenskiy NATO nıń bas xatkeri Mark Ryutte menen telefon arqalı sóylesti. Bul haqqında Ukraina prezidenti baspasóz xızmeti málim etpekte.

Xabarda aytılıwınsha, tárepler «házirgi waqıttaǵı jaǵday, sonday-aq, birgelikte Rossiyaǵa qarsı basımdı kúsheytiw» máselelerin dodaladı.
Sóylesiw dawamında Zelenskiy RF tárepi menen oq atıwdı toqtatıw boyınsha sóylesiwlerdi dawam ettiriwge tayar ekenin málim etken. Ol sáwbetlesine bunday ushırasıw ushın kórip shıǵılıp atırǵan format hám platformalar haqqında aytıp bergen.
Tárepler sonday-aq, Rossiyaǵa nátiyjeli tásir kórsetiwi múmkin bolǵan sankciyalardı da dodaladı. Olar Evropa Awqamınıń 17-sanciya paketi maqullanǵanın hám Ullı Britaniya tárepinen de sankciyalar boyınsha qararlar qabıl etilip atırǵanın atap ótti.
– NATO menen óz-ara birge islesiw hám gezektegi ushırasıwlarǵa tayarlıq kóriwge ayrıqsha itibar qaratıldı. Ukraina basshısı hám Alyans bas xatkeri baylanıslardı dawam ettiriwge kelisip aldı, – delinedi xabarda.

Qaraqalpaqstan xabar agentligi