Búgin ÓzLiDeP Qaraqalpaqstan Respublikalıq Keńesi baslaması menen Nókis Innavacion tehnologiyalar universitetinde “Jas isbilermenge ÓzLiDeP jaqın járdemshi” joybarı tiykarında “Kreativ ekonomika” qábiletti bizneske aylandırıw tiykarında oqıw -seminarı bolıp ótti.

Seminarda «Doslıq» ordeni iyesi ónerment Biybisara Qunnazarova jaslarǵa óz ónerin rawajlandırıw arqalı onı nátiyjeli bizneske aylandırıw haqqında óziniń tájiriybesi tiykarında jol jobalar kórsetip, milliyligimizdiń belgisi bolǵan qara úydiń baw-shuwların toqıw jolları hám usılları boyınsha jas isbilermenlerge sheberlik sabaǵın ótti. Óner úyreniwge qızıǵıwshılıǵı bar jaslardı shákirtlikke biypul qabılaytuǵının da bildirdi.
Seminar dawamında ÓzLiDeP Xojeli rayonlıq Keńesi apparat baslıǵı Aydos Tlepbergenov partiya tárepinen jas isbilermenler menen birge ótkerilip atırǵan ámeliy ilajlar haqqında maǵlıwmatalar berip ótti.
Sonday-aq, ushrasıwda rayonlıq salıq basqarması xızmetkerleriniń qatnasıwında Prezidentimizdiń usı jıl 19-marttaǵı “Kishi hám orta biznestiń ekonomikadaǵı ornın arttırıw ilajları haqqında”ǵı pármanı menen isbilermenler ushın jaratılǵan jeńillikler haqqında tolıq maǵlıwmatlar berildi.
Pármanǵa tiykarlanıp, kishi hám orta biznes subektleriniń rawajlanıwın xoshametlew maqsetinde 2025-jıl 1-maydan baslap ózin-ózi bánt etken shaxslar jeke tártiptegi isbilermen yamasa yuridikalıq shahs sıpatında mámleketlik dizimnen ótkerilgende, mámleketlik bajı óndirilmeydi. Óz jumısın tiyislisinshe orta yamasa iri biznes kategoriyasına shekem irilendirgen isbilermenlik subektlerine bir jıl dawamında qosımsha qun salıǵı summasınıń ornın qaplaw (qaytarıw) jeti kún múddette tezlestirilgen tártipte ámelge asırılatuǵınlıǵı haqqında maǵlıwmatlar berildi.
Sonday-aq, 2025-jıl 1-sentyabrden baslap sońǵı úsh jılda tovarlardı (xızmetlerdi) realizaciyalawdan alınǵan jámi dáramatı 10 milliard sumnan artpaǵan, byudjet hám kreditorlar aldında qarızdarlıǵı bolmaǵan hám turaqlı túrde salıq esabatların usınıp atırǵan, “Qáwip-qáterdi tallaw” elektron sistemasında huqıqbuzarlıq islew qáwpi tómen dárejede kategoriyalastırılǵan kishi hám orta biznes subektleriniń jumısın ıqtıyarlı túrde saplastırıwda salıq tekseriwi ótkerilmeytuǵınlıǵı atap ótildi .

Ushırasıw dawamında jas isbilermenlerge párman tiykarında ajıratılatuǵın kreditler hám jaratılǵan qosımsha imkaniyatlar haqqında da tolıq maǵlıwmat berildi. Jaslardıń sorawlarına qániygeler tárepinen juwap berildi.

Isbilermenlik jumısın baslaw niyetinde bolǵan 20 ǵa shamalas jastıń joybarları tıńlanıp, tiyisli maǵlıwmat berildi hám jol-jobalar kórsetildi.

Qaraqalpaqstan xabar agentligi