Búgingi kúnde xalıqtıń mápin gózlep, mashqalalardı úyreniw hám olarǵa ornında sheshim tabıw maqsetinde túrli aymaqlarda juwapker basshılar tárepinen kóshpeli qabıllawlar ótkerilip kelinbekte. Usınday ilajlardan biri Qaraqalpaqstan Respublikası Ishki isler ministrligi Jámiyetlik qáwipsizlik xızmeti Jol háreketi qáwipsizligi xızmeti baslıǵınıń orınbasarı, podpolkovnik B.Bobobekov basshılıǵında Beruniy rayonında shólkemlestirildi.

Kóshpeli qabıllaw dawamında rayonda jasawshı puqaralar ózlerin qıynap kiyatırǵan mashqalalar tuwralı usınıs hám pikirler menen múrájat etiw imkaniyatına iye boldı. Ulıwma esapta 7 puqaranıń arzası qadaǵalawǵa alındı, sonnan úshewi qabıllawdıń ózinde unamlı sheshildi, – dep maǵlıwmat beredi rayon hákimligi Málimleme xızmeti bólimi.
Múrájatlar tiykarınan jol háreketi qáwipsizligi máselelerine baylanıslı bolıp, sonıń ishinde, svetofor ornatıw, piyadalar jolına jasalma tosıqlar ornatıw, járiyma maydanında saqlanıp atırǵan avtotransport quralların qaytarıp alıw menen baylanıslı máselelerdi qamtıp aldı.
Podpolkovnik B.Bobobekov puqaralar tárepinen kóterilgen hár bir máselege qatań qatnas jasap, ayırım mashqalalardı ornında sheshiw ilajların kórdi. Qalǵan arzalar boyınsha bolsa juwapker uyımlarǵa anıq tapsırmalar berilip, qadaǵalawǵa alındı.

Qaraqalpaqstan xabar agentligi