21-may kúni futbol boyınsha 14 jastaǵı qızlar arasında Qaraqalpaqstan chempionatı bolıp ótti.

Jarısqa Nókis qalası hám rayonlardan jámi 6 komanda qatnastı hám chempionlıq ushın óz-ara qızǵın gúres júrgizdi.
Qızıqlı ótken oyınlar juwmaǵında, Ámiwdárya rayonı sport mektebi tárbiyalanıwshıları barlıq qarsılaslarınan jeńip, Qaraqalpaqstan chempionı ataǵına miyasar boldı.
Al, sıylı ekinshi hám úshinshi orınlar bolsa, Xojeli hám Qońırat rayonlarınıń sport mektepleri komandalarına nesip etti.
-Jarısqa puqta tayarlıq kórgen edik. Biraq, búgin áwmet qarsılas komandaǵa kúlip baqtı. Aldaǵı waqıtları bunnan juwmaq shıǵarıp, jeńimpazlıqtı qolǵa kirgiziwge háreket etemiz,-deydi Xojeli rayonı sport mektebi komandasınıń aǵzası Sárbinaz Biysenbaeva.

Adilbay Orazov,
Qaraqalpaqstan xabar agentligi sholıwshısı.