15-may – Xalıqaralıq shańaraq kúni múnásibeti menen Ámiwdárya rayonında keńnen belgilengen bayram ilajı kóterińki ruwxta ótti. Rayonlıq mádeniyat bóliminde shólkemlestirilgen saltanatlı máresimde “Jańa Ózbekstannıń ibratlı shańaraǵı” respublikalıq tańlawınıń Qaraqalpaqstan basqıshı jeńimpazları anıqlandı.

Bul tańlawda tabıslı qatnasqan Ámiwdárya rayonındaǵı 11 shańaraq “Jańa Ózbekstannıń ibratlı shańaraǵı” ataǵına iye bolıp, olar saltanatlı túrde sıylıqlandı. Jeńimpaz shańaraqlarǵa estelik sawǵaları hám arnawlı kókirek belgileri tapsırıldı, – dep maǵlıwmat beredi Ámiwdárya rayonı hákimligi Málimleme xızmeti bólimi.

Ilajda rayon hákiminiń birinshi orınbasarı F.Yusupov shıǵıp sóylep, elimizde shańaraqtıń jámiyettegi ornın arttırıw, shańaraq institutın hár tárepleme qollap-quwatlaw, tatıw turmıs tárizin qáliplestiriw, shańaraqtıń bekkemligin támiyinlew baǵdarında alıp barılıp atırǵan reformalarǵa toqtap ótti.

Sonday-aq, shańaraqlıq qádiriyatlar, óz-ara húrmet, awızbirshilik hám tınıshlıq principlerin qáliplestiriwáhmiyetli ekenligi atap ótildi.

Bayram ruwxında ótken ilaj dawamında jergilikli kórkem óner sheberleri tárepinen atqarılǵan nama-qosıqlar jıynalǵanlarǵa úlken quwanısh baǵıshladı.

Qaraqalpaqstan xabar agentligi