Beruniy rayonlıq partiya shólkemi Keńesi janındaǵı “Hayal-qızlar klubı” baslıǵı M.Durdıbaevanıń baslaması menen “Maqtumqulı” APJ aymaǵında jaylasqan 12-sanlı shańaraqlıq shıpakerlik punktinde “Hayal salamatlıǵı – salamat keleshek girewi” atamasında dógerek sáwbeti shólkemlestirildi, – dep maǵlıwmat beredi rayon hákimligi Málimleme xızmeti bólimi baslıǵı A.Urazova.

Bul ilajda “Háreketler strategiyası”nda belgilengen sociallıq tarawdı rawajlandırıwdıń tiykarǵı baǵdarları, atap aytqanda, xalıqtıń salamatlıǵın qorǵaw hám salamat turmıs tárizin úgit-násiyatlaw máseleleri dodalandı.

Ásirese, orınlarda tez hám sapalı medicinalıq xızmetlerdi jolǵa qoyıw arqalı xalıqtıń, atap aytqanda, hayal-qızlardıń salamatlıǵın bekkemlew baǵdarındaǵı jumıslarǵa ayrıqsha itibar qaratıldı.

Ilaj dawamında hayal-qızlar ushın jaratılǵan sharayatlar, densawlıqtı saqlaw sistemasındaǵı jańalıqlar hám keleshektegi rejeler haqqında sáwbetlesiw alıp barıldı. Qatnasıwshılar ózlerin qızıqtırǵan sorawlar menen múrájat etti hám tiyisli qánigelerden hár tárepleme juwap aldı.

Bunday ushırasıwlar xalıqtıń, ásirese, hayal-qızlardıń medicinalıq mádeniyatın arttırıw, olardı salamat turmıs tárizine baǵdarlawda áhmiyetli faktor bolıp xızmet etpekte.

Qaraqalpaqstan xabar agentligi