Berdaq atındaǵı Qaraqalpaq mámleketlik akademiyalıq muzıkalı teatrında 15-may – Xalıqaralıq shańaraq kúni múnásibeti menen bayram saltanatı ótkerildi.

Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı qutlıqladı.
Atap ótilgenindey, elimizde húrmetli Prezidentimizdiń basshılıǵında shańaraqtıń jámiyetlik turmısta tutqan ornın arttırıw, onı sociallıq, ekonomikalıq hám ruwxıy jaqtan qollap-quwatlaw, shańaraqlarda óz-ara awızbirshilik, tınıshlıq, tatıwlıq ortalıǵın jáne de kúsheytiw máselelerine ayrıqsha itibar qaratılmaqta.
Haqıyqatında da, xalqımız ázelden shańaraqtı Watan ishindegi Watan, jámiyetimizdiń tiykarǵı buwını, milliy qádiriyatlarımızdı ózinde jámlegen muqaddes dárgay sıpatında ayrıqsha qádirlep hám qásterlep kelgen. Ѳytkeni, barlıq iygilikli isler shańaraqtan baslanıp, onnan máhállege hám jámiyetke kirip baradı.
Saltanatlı bayram ilajında qala hám rayonlardaǵı úlgili shańaraq iyelerine «Ibratlı shańaraq» kѳkirek belgileri tapsırıldı.
Sonday-aq, «Jańa Ózbekstannıń ibratlı shańaraǵı» tańlawınıń Qaraqalpaqstan Respublikası basqıshı jeńimpazları múnásip sıylıqlandı.
Atap aytqanda, ótkerilgen tańlaw juwmaǵında, Taxtakópir rayonı Ǵárezsizlik mákan puqaralar jıyını aymaǵında jasawshı Jańabay Ismamutov hám Tamara Qıdırbaevalardıń shańaraǵı birinshi orındı iyelewge miyasar boldı.
Qanlıkól rayonı Nawrız mákan puqaralar jıyını turǵınları Tabınbay Úbbiniyazov hám Gúlbáhár Shırazovalardıń shańaraǵı ekinshi, Ellikqala rayonı Gúlistan elatınan Serik Bekishov hám Jeńisgul Muratovalardıń shańaraǵı sıylı úshinshi orınlarǵa múnásip dep tabıldı.
Bunnan soń kórkem óner hám mádeniyat xızmetkerleriniń atqarıwındaǵı koncert baǵdarlaması jıynalǵanlar názerine usınıldı.
Bayram ilajları «Doslıq» kanalı boyında teatrlastırılǵan saz-sáwbetli saxnalıq kórinisler menen dawam etti.

Qaraqalpaqstan xabar agentligi