Nókis qalasında 15-may-xalıqaralıq shańaraq kúni múnásibeti menen Ózbekstan «Adolat» social-demokratiyalıq partiyası hám Qaraqalpaqstan Respublikası Sport ministrliginiń shólkemlestiriwi menen «Salamat shańaraq ushın birleseyik!» súreni tiykarında shańaraqlıq sport jarısı ótkerildi.

Jarıstıń ashılıw máresiminde Ózbekstan «Adolat» SDPnıń baslıǵı R.Mahmudova, Qaraqalpaqstan Respublikası Sport ministri E.Qutıbaevlar shıǵıp sóylep, sońǵı jılları elimizde Prezidentimizdiń basshılıǵında shańaraqlardı hár tárepleme qollap-quwatlaw baǵdarında islenip atırǵan ilajlardı aytıp ótti hám qatnasıwshılarǵa áwmetler tiledi.

Jarısqa respublikamızdıń barlıq aymaqlarınan sportshı shańaraqlar qatnasıp, olar belgilengen shártler boyınsha óz-ara bellesti.
Qızǵın bellesiwlerge bay bolǵan jarıs juwmaǵında, Nókis qalasındaǵı Shıǵıs mákan puqaralar jıyınınan Haydarovlar shańaraǵı birinshi orındı iyelewge miyasar boldı.
Sıylı ekinshi hám úshinshi orınlar Bárkamal áwlad mákan puqaralar jıyınınan qatnasqan Primbetov hám Góne qala elatınan Pardaxanovlardıń shańaraqlarına nesip etti.
Ótkerilgen jarıs sońında, jeńimpazlar shólkemlestiriwshiler tárepinen tayarlanǵan arnawlı diplom hám estelik sawǵalar menen sıylıqlandı.
-Jarıs oǵada qızıqlı ótti hám onda bizler shańaraq aǵzalarımız benen birgelikte jeńimpazlıqtı qolǵa kirgiziwge miyasar boldıq,-deydi Rustam Haydarov.-Pursattan paydalanıp, bul jarıstı shólkemlestirgen shólkemlestiriwshilerge úlken raxmet aytaman. Aldaǵı waqıtları usınday jarıslar jiyi ótkerilip tursa, sportshı shańaraqlar sanı bunnan da kóp boladı, dep oylayman.

Adilbay Orazov,
Qaraqalpaqstan xabar agentligi sholıwshısı