Ózbekstan Respublikası Prezidentiniń 2020-jıl 6-oktyabrdegi “Málimleme texnologiyaları tarawındaǵı bilimlendiriw sistemasın jáne de jedellestiriw, ilimiy-izertlewlerdi rawajlandırıw hám IT-industriya menen integraciyalaw ilajları haqqında”ǵı qararına muwapıq, Qaraqalpaqstan awıl xojalıǵı hám agrotexnologiyalar institutı tárepinen ulıwma bilimlendiriw mektepleriniń pitkeriwshileri arasında “Informatika hám málimleme texnologiyaları” páni boyınsha olimpiada shólkemlestirildi.

Eń dáslep institut rektorı B.Jollıbekov ótkerilip atırǵan olimpiada qatnasıwshılarına institut haqqında hám búgingi kúnde IT tarawınıń awıl xojalıǵındaǵı ornı haqqında maǵlıwmatlar keltirip, qatnasıwshılarǵa áwmet tiledi.
Soń shólkemlestiriwshiler tárepinen olimpiadanıń tártip-qaǵıydaları túsindirildi.
Derlik 3 saat dawam etken olimpiadanıń barısın ata-analar hám ustazları onlayn baqlap otırıwı ushın sharayatlar jaratıldı.
Olimpiada juwmaǵına bola Shomanay rayonındaǵı 7-sanlı mektep pitkeriwshisi I.Tólepov jeńimpaz boldı. Oǵan institut tárepinen tayarlanǵan bahalı sawǵa hám maqtaw jarlıqları tapsırıldı.
Olimpiadada belsene qatnasqan qatnasıwshılar da múnásip sıylıqlandı.

Qaraqalpaqstan xabar agentligi