Berdaq atındaǵı Qaraqalpaq mámleketlik universitetinde «Korrupciya – jaslar keleshegine qáwip salıwshı illet» atamasında ilaj bolıp ótti.

Ilajǵa Qaraqalpaqstan Respublikası Ministrler Keńesi janındaǵı Korrupciyaǵa qarsı gúresiw bólimi baslıǵı B.Matmuratov, Qaraqalpaqstan Respublikası Ádillik ministriniń birinshi orınbasarı A.Prenov, Qaraqalpaqstan Respublikası Xojeli rayonı sudınıń baslıǵı S.Dawletmuratov, Bas Prokuratura janındaǵı ekonomikalıq jınayatlarǵa qarsı gúresiw departamenti Qaraqalpaqstan Respublikası basqarmasınıń bólim baslıǵı R.Sadıkov, Qaraqalpaqstan Respublikası Prokuraturası bólim aǵa prokurorı N.Yuldashov, sonday-aq, universitettiń barlıq fakultetleri dekanları, professor-oqıtıwshılar hám student-jasları qatnastı.
Ilajdı universitet rektorı, akdemik A.Reymov ashtı hám alıp bardı.
Ol óziniń shıǵıp sóylegen sózinde usı jıldıń 5-mart kúni Húrmetli Prezidentimizdiń basshılıǵında bolıp ótken, korrupciyanıń aldın alıw boyınsha jumıslardıń nátiyjeliligi hám aldaǵı áhmiyetli wazıypalarǵa baǵıshlanǵan keńeytilgen májiliste alǵa qoyılǵan tapsırmalarǵa hár tárepleme toqtap ótti. Sonday-aq, korrupciya tek ǵana ekonomikalıq rawajlanıwǵa emes, al, jámiyette ádillik principleriniń buzılıwına, xalıqtıń nızamlarǵa bolǵan iseniminiń tómenlewine hám eń ashınarlısı, jas áwladtıń sanasında nızamlarǵa húrmetsizlik túsiniginiń qáliplesiwine alıp keliwi múmkin ekenligin atap ótti.
Ilajda sózge shıqqanlar, korrupciya – elimiz rawajlanıwına úlken kedergi ekenligi, korrupciya hár qanday mámleket hám jámiyettiń siyasiy-ekonomikalıq rawajlanıwına úlken zıyan kórsetetuǵınlıǵı, mámlekettiń Konstituciyalıq tiykarların hám nızam ústinligi, sonıń menen birge insan huqıqları hám erkinlikleriniń támiyinlenbewine alıp keletuǵınlıǵı, sol sebepli mámleketimizde korrupciyaǵa qarsı gúresiwdiń anıq sisteması jaratılǵanlıǵı, bul boyınsha bir qatar nızamlar, Prezident qararları qabıl etilip atırǵanlıǵın aytıp ótti. Usı baǵdarda profilaktikalıq úgit-násiyatlaw ilajlar alıp barılıwına qaramastan korrupciya menen baylanıslı huqıqbuzarlıqlar júz berip atırǵanlıqların anıq faktler menen keltirip ótti.
Bayanatshılar korrupciya jınayatınıń túsinigi, bul jaman illettiń aldın alıw hám oǵan qarsı gúresiw boyınsha usınısların bildirdi. Ilajda hár bir xızmetkerdiń Watanǵa, óz kásibine bolǵan súyispenshiligin bekkemlew, hár túrli unamsız háreketlerdiń aldın alıw, professor-oqıtıwshılar ózlerin ilim-bilimdi rawajlandırıwǵa baǵıshlaw, jaslardı Watansúyiwshilik ruwxında tárbiyalaw, olarda huqıqıy sana hám mádeniyattı, dúnyalıq, ilimiy hám ádep-ikramlılıq dárejesin arttırıw hám de qáliplestiriw hár bir universitet xızmetkeriniń wazıypası ekenligi atap ótildi.
Ótkerilgen ilaj mámleketimizde korrupciyaǵa qarsı gúresiw baǵdarında ámelge asırılıp atırǵan jumıslar, ásirese, jaslarda korrupciyaǵa qarsı immunitetti qáliplestiriw, olarda Watansúyiwshilik pazıyletlerin arttırıwǵa xızmet etetuǵın áhmiyetli ilajǵa aylandı.

Adilbay Orazov,
Qaraqalpaqstan xabar agentligi sholıwshısı