Mámleketimiz aymaǵında ázelden kóplegen millet hám xalıq wákilleri tatıw jasap kelmekte. Xalqımız ázelden keńpeyillik, miymandoslıq, keshirimlilik, basqalardıń úrp-ádet hám qádiriyatların húrmet etiw sıyaqlı ulıwmainsanıylıq pazıyletlerdi kórsetip kelgen. Milletler aralıq tatıwlıq ulıwma insanıylıq qádiriyat bolıp, region hám mámleketlerdiń milliy rawajlanıwın belgileydi, tınıshlıq hám turaqlılıqtıń kepili bolıp xızmet etedi.

Búgingi kúnde elimizde Prezidentimizdiń basshılıǵında milletler aralıq tatıwlıqtı bekkemlew, xalıqlar arasında óz ara awızbirshilikti támiyinlew, keńpeyillik hám miyrim-shápáát ortalıǵın ele de kúsheytiwge ayrıqsha itibar qaratılǵan. Milletler aralıq tatıwlıq hár bir shańaraqta ata-ana tárbiyasınan baslanıp, bilimlendiriw mákemlerinde ustaz tárbiyası arqalı oqıwshı-jaslarǵa doslıq túsinikleri qáliplestirilip barıladı.
Ájiniyaz atındaǵı NMPI akademiyalıq liceyinde milletler aralıq tatıwlıq temasında ilaj bolıp ótti. Ilajdı akademiyalıq licey direktorı O.Qalxorazov ashıp berdi. Onda Qaraqalpaqstan Respublikası Ministirler Keńesiniń Din isleri boyınsha bas qánigesi Q.Nizamatov, Nókis qalası ruwxıy-aǵartıwshılıq orayı baslıǵı Q.Nuratdinov, Nókis qalası úgit násiyatlaw topar aǵzası A.Dalımbetova hám oqıtıwshılar menen oqıwshı-jaslar qatnastı. Ilajda shıǵıp sóylegenler mámleketimizde milletler aralıq tatıwlıq boyınsha alıp barılıp atırǵan keń kólemli ilajlar haqqında sóz etip, jaslardı qaysı millet bolıwına qaramastan awızbirshilikte jasawǵa shaqırdı.
Licey oqıtıwshıları hám oqıwshı-jaslar hár túrli millet hám xalıqlardıń tili, mádeniyatı, úrp-ádet hám dástúrlerin saqlaw, rawajlandırıw boyınsha saxnalıq kórinisler qoyıp berip, kórgizbe shólkemlestirildi.
-Toparımızda hár túrli millet wákilleri bir ata-ananıń perzentlerindey birgelikte, tatıwlıqta bilim alıp atırmız. Búgingi ilajda oqıw orınımızdaǵı milletler aralıq tatıwlıq óz kórinisin tawıp, aladǵı waqıtlarda da bul doslıǵımız bekkemlenip baradı,-deydi licey oqıwshısı Sh. Maqsetbaev.
Ilaj licey oqıwshılarınıń atqarıwındaǵı koncert baǵdarlaması menen dawam etti.

Qaraqalpaqstan xabar agentligi