Sanlı texnologiyalar búgin xalıq xojalıǵınıń barlıq tarawlarına keńnen engizilip, xalqımızdıń múshkilin jeńilletiwde biyminnet xızmet atqarmaqta. Sonıń ishinde, elimizdegi gaz támiynatında da bul baǵdardaǵı jumıslar jedel alıp barılmaqta.

Atap aytqanda, tikkeley sanlı texnologiyaǵa baylanıslı bolǵan xojalıqlarǵa ornatılǵan zamanagóy elektron gaz esaplaǵıshlardıń atqarıp atırǵan xızmetin til menen aytıp jetkeriw qıyın.

-Búgingi kúnge shekem respublikamızdaǵı 287 mıńnan aslam tábiyǵıy gaz tutınıwshısınıń úylerine aqıllı esaplaǵıshlar ornatıldı,-deydi «Hududgaz Korakalpogiston» gaz tamiynatı filialınıń bólim baslıǵı Artıkbay Jiemuratov.-Quwanıshlı tárepi sonda, tutınıwshılar gezekte turmay tábiyǵıy gaz ushın tólemlerdi onlayn ámelge asırıp kelmekte. Eń tiykarǵısı tutınıwshılarda itibar hám juwapkershilik bolsa bolǵanı. Usı jerde respublika aymaǵında 13 003 jeke xojalıqlardıń tábiyǵıy gaz támiynatı 3 basqıshlı sistemadan 2 basqıshlı sistemaǵa ótkerilip, hárekettegi 1985 gaz bólistiriwshi punktler demontaj islengenin, xojalıqlardaǵı eskirgen gaz úskeneleri zamanagóy eneriya únemlewshi gaz úskenelerine almastırılǵanın aytıp ótsek orınlı boladı.
-Bıyılgı jıldıń ózinde 59,1 km den aslam gaz tarmaqları rekonstrukciyalanıp, 23 km jer ústi gaz tarmaqları tártipke keltirildi,-deydi Artıkbay Jiemuratov óz sózin dawam etip.-Bul jumıslardı ámelge asırıwda 100 den artıq jumısshılar hám 20 ǵa shamalas arnawlı texnikalar qatnastı. Avtomatlastrılǵan máhálle tutınıw qadaǵalaw esap balansı sistemasın iske túsiriwden tiykarǵı maqset tarawda sanlı texnologiyanı jáne de keńnen en jaydırıw bolıp esaplanadı. Bunıń nátiyjesinde aymaqlarda jıllıq gaz shıǵınlarınıń aldı alınıp, tábiyǵıy gaz bir neshe esege únemlenedi hám támiynat bolsa jaqsılanadı. Házirgi waqıtları respublikamızdıń barlıq aymaqlarında tutınıwshılarǵa tábiyǵıy gazdi insan basqarıwısız sanlı texnologiyalar járdeminde bir tegis jetkerip beriw isleri qızǵın dawam etpekte.

Adilbay Orazov,
Qaraqalpaqstan xabar agentligi sholıwshısı