Tórtkúl rayonında jasalma usılda alkogol ónimlerin islep shıǵarıp atırǵan shólkemlesken jınayatshılar toparınıń jumıslarına shek qoyılıp, 2 tonna jasalma usılda tayarlanǵan alkogol ónimleri hám 718 litr spirttiń aylanısqa shıǵarılıwınıń aldı alındı.

Atap aytqanda, Qaraqalpaqstan Respublikası Bajıxana basqarması Kontrabandaǵa qarsı gúresiw bólimi, MQX, Milliy gvardiya hám IIM xızmetkerleri menen birgelikte jasalma alkogol ónimleriniń nızamǵa qarsı aylanıwına hám “jasırın cex”lardıń jumıslarına shek qoyıw maqsetinde operativ ilaj ótkerildi.
Operativ maǵlıwmatlarǵa tiykarlanıp, Tórtkul rayonında jasawshı puqara O.O.nıń jasaytuǵın úyi kózden keshirilgeninde, 3357 jasalma akciz markaları, jámi 600 litr jasalma akciz markalı hám ulıwma akciz markasına iye bolmaǵan 0,5 litrlik kólemge iye shiyshelerde alkogolli ishimlikler, jasalma usılda plastmassa ıdısqa tayarlap qoyılǵan jámi 125 litrlik alkogol ónimleri, 18 litr etil spirti, 1300 litrlik plastmassa ıdıs, 3750 kapsula, 6254 QR kodı túsirilgen nakleyka, 1873 stiker, 315 bos shiyshe, 2768 plastmassa shiyshe qaqpaq, 4853 temir shiyshe qaqpaqlar hám basqa da ayǵaqlı zatlar menen jasalma usılda alkogol ónimlerin tayarlap atırǵanı anıqlanıp, jınayatlı islerine shek qoyıldı.
– Operativ ilaj dawam ettirilip, usı rayondaǵı Tazabaǵjap awılı aymaǵında jasawshı taǵı bir puqaranıń jasaytuǵın úyi kózden ótkerilgeninde 35-20 litrlik kólemli kanistrlarda jámi 700 litr etil spirtin keyinirek jasalma usılda araq ónimlerin tayarlawshı “jasırın cex”larǵa jetkeriw maqsetinde saqlap atırǵanlıǵı anıqlandı,-deydi bajıxana basqarması xızmetkeri B.Tajetdinov.
Rayondaǵı gezektegi shańaraq kózden ótkerilgeninde, jasalma usılda alkogol ónimlerin tayarlawda qollanılatuǵın úskeneleri bar ekenligi anıqlandı. Shańaraqtan 16 rulonda hám kesilgen jaǵdaydaǵı araqlardı bloklawda paydalanılatuǵın ashıq polietilen paketler, plastmassa ıdıslar, gaz gorelkası, 0,2 hám 0,5 litrlik sıyımlılıqtaǵı jámi 69 bos shiyshe, 1 gaz reduktorı, 6 voronka, 7 boyaw shyotkaları, 10 metrlik polietilen shlanga hám 3 polietilen paketler ayǵaqlı zat retinde alındı.
Al, keyingi mánzilde jasalma usılda tayarlanǵan alkogol ónimleri “realizaciya”ǵa shıǵarıladı eken. Puqara A.A.nıń jasaytuǵın úyi kózden ótkerilgeninde, úyinde jasalma usılda islep shıǵarılǵan, jasalma akciz markaları menen markalanǵan 0,45, 0,5, 0,75 hám 0,2 litrlik sıyımlılıqtaǵı 2622 shiyshede, jámi 1294 litrlik araqlardı keyinirek aylanısqa shıǵarıw maqsetinde “Yama” jolı menen saqlap qoyǵanlıǵı anıqlandı.
Spirt hám alkogol ónimleriniń nızamǵa qarsı aylanısınıń aldın alıw boyınsha ótkerilgen keń kólemli operativ ilaj dawamında huqıqbuzarlardan jámi bahası 194 million sumlıq 2 tonna alkogol ónimleri, 718 litrlik spirt ónimleri hám basqa buyımlar ayǵaqlı zat retinde alıp qoyıldı.
Usı jaǵday boyınsha Qaraqalpaqstan Respublikası Bajıxana basqarmasınıń Sorastırıw hám hákimshilik ámeliyatı bólimi tárepinen jınayatqa baylanıslı shaxslardıń qarsısına ÓzR JKniń 176-statyası 1-bólimi, 1861-statyası 2-bólimi menen jınayat isi qozǵatıldı.

Á.Jiyemuratov,
Qaraqalpaqstan xabar agentligi