Ózbekstan Respublikası Prezidenti janındaǵı Mámleketlik siyasat hám basqarıw akademiyasında “Ibratli oila” kókirek belgisi óz iyelerine saltanatlı túrde tapsırıldı.

BMSh Bas Assambleyası tárepinen 1993-jıl 20-sentyabrdegi Xalıqaralıq shańaraq jılı haqqındaǵı rezolyuciyasına muwapıq, 15-may dúnya kóleminde Xalıqaralıq shańaraqlar kúni sıpatında 1994-jıldan berli turaqlı túrde belgilenbekte.
Mámleketimizde 10 million 300 mıńnan aslam shańaraq bolıp, sonnan 2 millionnan aslamı jas shańaraqlar bolıp esaplanadı.
Prezidentimizdiń “Ózbekstan – 2030” strategiyasın “Qorshaǵan ortalıqtı qorǵaw hám “jasıl ekonomika” jılında ámelge asırıwǵa baylanıslı mámleketlik baǵdarlamacı haqqında”ǵı pármanında da shańaraq institutın bekkemlew máselesine ayrıqsha áhmiyet qaratılǵan.
Mámleketimiz basshısınıń ideyası tiykarında elimizde “Ibratli oila” kókirek belgisiniń shólkemlestirilgeni dúnya xalqı háwes etse arzıytuǵın qádiriyatlarımızdı úgit-násiyatlawda áhmiyetli faktor bolmaqta. “Ibratli oila” kókirek belgisiniń sociallıq-ruwxıy turmısımızǵa kirip kelgeni keń jámiyetshilik tárepinen qızǵın kútip alındı.
Perzentlerin hadal, watansúygish hám bilimli insanlar etip tárbiyalap atırǵan, shańaraqlıq qádiriyatlardı saqlaw hám rawajlandırıwǵa úles qosıp atırǵan, turmıslıq tájiriybelerin ǵalaba en jaydırıwǵa múnásip bolǵan shańaraqlar hár jılı 15-may – Xalıqaralıq shańaraq kúni aldında “Ibratli oila” kókirek belgisi menen sıylıqlanıwı dástúrge aylandı. Bul kókirek belgisi milliy hám ulıwma insanıylıq qádiriyatlardı úgit-násiyatlawda, perzentlerimizdi múnásip insanlar etip tárbiyalawda ayrıqsha áhmiyetke iye.
Sonday-aq, usı jılı mámleketimiz basshısı tárepinen 2025-jıl 7-mart kúni jaqsı milliy qádiriyatlarımızdı rawajlandırıwǵa úles qosıp atırǵan shańaraqlardıń qatarın keńeytiw boyınsha belgilengen wazıypalar tiykarında kókirek belgisi menen sıylıqlaw sisteması jáne de jetilistirildi hám bıyıl kókirek belgisine tańlaw processleri jańa kózqaraslar tiykarında shólkemlestirildi.
2025-jılı aymaqlıq komissiyalar, ministrlikler hám uyımlar tárepinen usı kókirek belgisine 5 mıńnan aslam shańaraq usınıs etildi hám qatnasıwshı shańaraqlardıń sanı ótken jılǵa salıstırǵanda 5,1 esege arttı. Nátiyjede ótken 2024-jılı jámi 208 shańaraqqa usı kókirek belgisi tapsırılǵan bolsa, bıyılǵı 2025-jılı 2000 shańaraq “Ibratli oila” kókirek belgisi menen sıylıqlandı.
Házirgi kúnlerde mámleketimiz tariyxında ekinshi márte 15-may – Xalıqaralıq shańaraq kúni bayramı aldındaǵı saltanatlı sıylıqlaw máresimlerinde usı kókirek belgisi óz iyelerine tapsırılmaqta.
Rejege muwapıq, húrmetli hayal-qızlardı ulıǵlaw hám qádirlew maqsetinde kókirek belgisi, ádette, shańaraq iyesi bolǵan hayal-qızdıń atına rásmiylestirilip beriliwi de shańaraq hám jámiyette hayaldıń abırayınıń artıwına xızmet etedi.
Bul shańaraqlarǵa “Ibratli oila” kókirek belgisi, gúwalıǵı hám aqshalay sıylıqlar tapsırıladı, olar jasaytuǵın kvartiralar hám turaq jaylardıń kiriw bólegine húrmet belgisi ornatıladı.
Saltanatlı ilajǵa mámleketlik hám jámiyetlik wákiller, túrli shólkemlerdiń juwapkerleri, senatorlar, deputatlar, ilimpazlar, dóretiwshiler hám kórkem óner ǵayratkerleri, sonday-aq, elimizdiń shańaraq hám hayal-qızlar sistemasınıń rawajlanıwına múnásip úles qosıp atırǵan belsendiler, ustazlar mirát etildi.
Paytaxtımızda jasap atırǵan bir qatar úlgili shańaraq wákillerine “Ibratli oila” kókirek belgisi tapsırıldı.
Saltanatlı ilajda mámleketimizde shańaraqlardı bekkemlew baǵdarındaǵı iygilikli baslamalar haqqında hár tárepleme sóz etildi. “Ibratli oila” kókirek belgisi óz iyelerine tapsırıldı.
Ilajdıń muzıkalı-kórkem bólimi Ózbekstan Kásiplik awqamları Federaciyasınıń Mádeniyat sarayında dawam etti.
Saltanatlı ilajda Ózbekstan Respublikası Bas ministriniń orınbasarı – Shańaraq hám hayal-qızlar komitetiniń baslıǵı Zulayho Mahkamova shıǵıp sóyledi.

Nazokat Usmonova,
ÓzAnıń xabarshısı