Kegeyli rayonında Qaraqalpaqstan xalıq jazıwshısı, filologiya ilimleriniń doktorı, professor Kamal Mambetov tuwılǵanınıń 85 jıllıǵına baǵıshlanǵan eslew keshesi bolıp ótti. Keshege jazıwshınıń perzentleri, shákirtleri, zamanlasları hám keń jámiyetshilik wákilleri qatnastı.

Onda Qaraqalpaqstan Jazıwshılar awqamınıń baslıǵı K.Karimov, «Ámiwdárya» jurnalınıń bas redaktorı X.Dáwletnazarov, filiologiya ilimleriniń doktorı, professor Q.Orazımbetov, Nuraniylar qorı Qaraqalpaqstan Respublikalıq bólimi baslıǵı T.Abdijabbarov hám basqalar shıǵıp sóylep, yubilyardıń respublikamız ilimi hám ádebiyatın rawajlandırıwǵa qosqan salmaqlı úlesi, jazǵan ilimiy-dóretiwshilik miynetlerin húrmet penen tilge aldı.
Ásirese, K.Mambetovtıń erte dáwirdegi qaraqalpaq ádebiyatın ilimiy jaqtan izertlew, «Posqan el» trilogiyasın dóretiwdegi miynetleri xalqımız yadında máńgi saqlanadı, dep atap ótildi.
Maǵlıwmat sıpatında aytatuǵın bolsaq, Kamal Mámbetov 1940-jıl 14-mayda Kegeyli rayonında tuwılıp, óziniń ilimiy hám dóretiwshilik jumısın «Sovet Qaraqalpaqstanı» házirgi «Erkin Qaraqalpaqstan» gazetasında baslap, keyin ala pedagogikalıq institut hám Qaraqalpaq mámleketlik universitetinde dáslep oqıtıwshı, sońınan kafedra baslıǵı, dekan hám rektor lawazımlarında jemisli miynet etti.
-Kamal aǵa Mámbetovtıń ilimiy miyrası qaraqalpaq ádebiyatınıń erte basqıshlarınan baslap, onıń qáliplesiw dárekleri, ózbek hám qaraqalpaq ádebiy baylanısları, sonday-aq, shıǵıs ádebiyatı menen baylanıslı mashqalalardı qamtıp aladı,-deydi ilimpazdıń shákirti professor Q.Orazımbetov.-Onıń “Áyyemgi qaraqalpaq ádebiyatı,” “Nawayı hám qaraqalpaq ádebiyatı,” “Shıǵıs ádebiyatı tariyxı,” “Qaraqalpaq tolǵawları” sıyaqlı kitapları milliy ádebiyattanıwımız ushın áhmiyetli derek bolıp xızmet etpekte. Sonday-aq, ol “Gójek,” “Tırnalar,” “Hújdan,” “Posqan el,” “Túrkstan” sıyaqlı shıǵarmaları menen qaraqalpaq ádebiyatınıń rawajlanıwına múnásip úles qosqan.
1983-1984-oqıw jılında onıń baslaması menen universitet tariyxında birinshi márte jurnalistika qánigeliginiń ashılǵanı Qaraqalpaqstanda taraw qánigelerin tayarlawǵa úlken tiykar jarattı.
Haqıyqatında da Kamal Mámbetov – tek ǵana belgili ilimpaz hám jazıwshı emes, al xalıq isenimine erisken jámiyetlik ǵayratker sıpatında da tariyxta óshpes iz qaldırdı.
Onıń atı, ilimiy hám ádebiy miyrası jas áwladlar ushın ilham dáregine aylanıwı sózsiz. Keshede jazıwshınıń kórkem shıǵarmaları tiykarında tayarlanǵan saxnalıq kórinis, jıynalǵanlar názerine usınılıp, bul ilajǵa ózgeshe zawıq baǵıshladı.
Ilaj sońında Kamal Mámbetovtıń perzentleri atınan fizika-matematika ilimleriniń kandidatı, docent Alisher Mambetov, filologiya ilimleri boyınsha filosofiya doktorı (Phd) Ikram Mambetovlar kesheni shólkemlestirgeni ushın shólkemlestiriwshilerge tereń minnetdarshılıq bildirdi.

Adilbay Orazov,
Qaraqalpaqstan xabar agentligi sholıwshısı.