Qaraqalpaqstan Respublikası Salıq basqarması tárepinen Taxtakópir rayonında jumıs alıp barıp atırǵan kishi hám orta biznes wákilleri menen ushırasıw ótkerildi.

Seminarda mámleketimiz basshısı tárepinen usı jıldıń 19-mart kúni kishi hám orta biznes wákilleri menen tarawdıń ekonomikadaǵı ornın arttırıw hám rawajlanıwın jańa basqıshqa alıp shıǵıw máselelerine baǵıshlanǵan ushırasıwında belgilengen maqset hám wazıypalar haqqında da maǵlıwmatlar berildi.
Ashıq-aydın pikirlesiwde qatnasıwshılardan onnan aslam másele boyınsha múrájatlar hám usınıslar kelip tústi. Ushırasıw juwmaqları boyınsha bildirilgen usınıslar ulıwmalastırılıp, rayonda isbilermenlikti jáne de rawajlandırıw boyınsha ámeliy ilajlar belgilep alındı.
Ilaj sońında mámleketimiz ekonomikası hám jeke menshik sektordıń rawajlanıwına múnásip úles qosıp atırǵan bir topar úlgili salıq tólewshilerge minnetdarshılıq bildirilip, estelik sawǵaları tapsırıldı.

Qaraqalpaqstan xabar agentligi