Búgingi kúnde Tórtkúl rayonında puqaralardıń mashqalaların ornında sheshiw, olardıń múrájat hám usınısların tikkeley tıńlaw maqsetinde rayon hákimi I.Xudaybergenovtıń máhállelerdegi kóshpeli qabıllawları sistemalı túrde ótkerilmekte.
Atap aytqanda, búgin “Nurata” mákan puqaralar jıyınındaǵı mádeniyat orayında gezektegi kóshpeli qabıllaw bolıp ótti. Onda “Atayurt,” “Bazirgen,” “Kaltaminor,” “Paxtachi” hám “Bahor” máhállelerinde jasawshı puqaralar qatnasıp, ózlerin qıynap kiyatırǵan mashqala hám máseleler boyınsha múrájatlar menen shıqtı,- dep maǵlıwmat beredi rayon hákimligi Málimleme xızmeti bólimi.
Bul ilajda rayon hákimi menen birge máhálle jetiligi aǵzaları, sonday-aq, rayondaǵı tiyisli shólkem hám uyımlardıń basshıları da qatnastı. Qabıllaw dawamında jámi 17 múrájat qabıl etildi. Múrájatlarda tiykarınan turaq jay, sociallıq infrastruktura, bántlik, jollardı ońlaw, ishimlik suwı menen támiyinlew sıyaqlı máseleler kóterildi.
Hár bir múrájat máhálle jetiligi qatnasıwında hár tárepleme kórip shıǵıldı. Puqaralardıń mashqalaların ornında sheshiw, olardıń nızamlı máplerin támiyinlew maqsetinde tiyisli shólkemlerdiń basshılarına anıq tapsırmalar berildi. Hár bir másele boyınsha orınlanıwı kerek bolǵan wazıypalar belgilendi, orınlanıwı ushın múddetler qoyıldı hám qadaǵalawǵa alındı.
Bunday kóshpeli qabıllawlar puqaralardıń mámleketlik hákimiyat uyımlarına bolǵan isenimin bekkemlew, olardıń múrájatlerin tez hám ashıq-aydın túrde kórip shıǵıw imkaniyatın jaratpaqta.
Qaraqalpaqstan xabar agentligi