Demokratiyalıq jámiyette saylawshılar óz wákilleri menen ushrasıwı, jumısın baqlaw hám bahalaw huqıqına iye bolıp, bul process tek ǵana deputattıń juwapkershiligin arttırıp qoymastan, al saylawshılar menen ashıq hám nátiyjeli baylanıstı támiyinlep, bildirilgen isenimdi tolıq aqlaw jolında jumısın tallaw imkaniyatın beredi.
Qońırat rayonı “Qıpshaq” hám “Ájiniyaz” APJ aymaǵındaǵı ÓzLiDeP belsendisi, Qaraqalpaqstan Respublikası Joqarǵı Keńesiniń deputatı Baxodirjon Sidiqovtıń saylawshılar menen ushırasıwı da joqarıdaǵı máseleler boyınsha áhmiyetli boldı.
Deputat saylanǵan 51-Qaratal saylaw okrugi jaylasqan aymaqtaǵı mákan puqaralar jıyınları juwapkerleri hám saylawshılar, sonday-aq, mámleketlik hám mámleketlik emes shólkemlerdiń wákilleri, jámiyetlik belsendiler, nuraniylar qatnasqan ilajda deputat B.Sidiqov nızamshılıqtaǵı jańalanıwlar, qabıl etilip atırǵan nızamlardıń mazmun mánisi, sonday-aq “Ózbekstan-2030” strategiyası sheńberinde elimizde alıp barılıp atırǵan ámeliy ilajlar boyınsha maǵlıwmatlar berip, máhálle xalqın qıynap atırǵan mashqalalardı tıńladı.
Kóp jıllardan berli itibardan shette qalıp kiyatırǵan ishki kóshelerge asfalt tósew, gónergen sım aǵashlardı jańasına almastırıw, transformator ornatıw, qıytaq jerlerdi suwǵarıw hám tozıwı jetken suw trubaların jańasına almastırıw máseleleri, sonday-aq, “Qıpshaq” máhállesindegi 24-sanlı mektepke zamanagóy sport zal hám asxana qurıp beriw boyınsha múrájatlardıń sheshimi úyrenildi.
Sonıń menen birge, aymaqtaǵı máhállelerdiń kósheleri, trotuar jolları hám olardaǵı jaqtılandırıw sistemalarında anıqlanǵan kemshilikler boyınsha saylawshılardıń deputatımızǵa etken múrájatları tiyisli tártipte shólkemlestirilgen ámeliy ilajlar nátiyjesinde izbe-izlik penen saplastırılatuǵın boldı.
Ushırasıw dawamında xalıqtıń mashqalaları hám múrájatları boyınsha juwapker shólkemlerge tapsırmalar berilip, ámeliy járdemler kórsetildi.
Ilajda shıǵıp sóylegen aymaqtaǵı MPJ baslıqları hám saylawshılar deputat B. Sidikovtıń jumısın unamlı bahalap, onıń ótken dáwirdegi jumıslarına baylanıslı bir qatar unamlı mısallardı atap ótti.
Deputattıń saylawshılar menen bolǵan ushrasıwı, onıń aymaqtaǵı kóplegen máselelerde saylawshılardıń isenimin aqlawı, xalıqtı razı etiwge qaratılǵan ámeliy jumısları menen áhmiyetli boldı.
Qaraqalpaqstan xabar agentligi