Ózbekstan Respublikası Prezidentiniń 2024-jıl 19-apreldegi «Ekonomikada mámlekettiń qatnasın qısqartıwdıń qosımsha ilajları haqqında»ǵı qararına muwapıq, kóshpes múlk obektleri ǵalabalıq sawdalarǵa shıǵarılıwı belgilengen.

Aymaqlarda usı qarardıń áhmiyetin isbilermenlerge hám keń jámiyetshilikke túsindiriw, onı úgit-násiyatlaw jumısların jedellestiriw maqsetinde, Mámleketlik aktivlerdi basqarıw agentligi tárepinen Nókis kalası Jaslar orayında menshiklestiriliwi belgilengen mámleketlik aktivler, sonıń ishinde, kárxanalardaǵı mámleketlik úlesler, bos turǵan mámleketlik múlk obektleri hám satılıwı belgilengen jer uchastkaları haqqında gezektegi «Roadshoy» prezentaciyası ótkerildi.
Ilajǵa 200 den aslam isbilermen hám investorlar, jergilikli hákimlikler hám Qaraqalpaqstan Respublikasındaǵı iri kárxanalardıń wákilleri qatnastı.
Onı Mámleketlik aktivlerdi basqarıw agentliginiń Qaraqalpaqstan Respublikası aymaqlıq basqarmasınıń baslıǵı Maxsud Radjapov basqarıp bardı.
Ilajda Mámleketlik aktivlerdi basqarıw agentlik direktorınıń birinshi orınbasarı Nodir Xusanov shıǵıp sóylep, sońǵı jılları mámleketimizde menshiklestiriw tarawındaǵı normativlik-huqıqıy hújjetlerdi jetilistiriw, isbilermenlikti rawajlandırıw hám qollap-quwatlaw boyınsha iri reformalar ámelge asırılıp, isbilermenler ushın bir qatar jańalıqlar hám qolaylıqlar jaratılǵanın atap ótti.
Sonday-aq, prezentaciyada Mámleketlik aktivlerdi basqarıw agentliginiń Qaraqalpaqstan Respublikası aymaqlıq basqarması baslıǵınıń orınbasarı Qural Qarlıbaev, E-aukcion akcionerlik kommerciyalıq jámiyetiniń Qaraqalpaqstan Respublikasındaǵı wákili Ruslan Esimbetovlar sońǵı jılları respublikamızda bul baǵdarda islengen jumıslar hám aldaǵı waqıtları isleniwi tiyis wazıypalar haqqında ilaj qatnasıwshılarına keń túrde túsinikler berdi. Sonıń menen birge, Ózbekstan Respublikası Prezidentiniń 2025-jıl 21-apreldegi 70-sanlı Pármanınıń xalqımız turmısındaǵı tutqan áhmiyetine keńnen toqtap ótti.
-Bul ilajdı ótkeriwden tiykarǵı maqset, isbilermenlerge keń imkaniyatlar jaratılǵanlıǵın sonday-aq, olar menen birge islesiw, mashqalaların úyreniw, sonıń menen birge mámleketlik aktivlerdiń sawdaǵa shıǵıwı hám olardıń satılıwı jónindegi maǵlıwmatlardıń járiyalılıǵın támiyinleyden ibarat,-deydi Mámleketlik aktivlerdi basqarıw agentliginiń Qaraqalpaqstan Respublikası aymaqlıq basqarması baslıǵınıń orınbasarı Qural Qarlıbaev.
Kóterińki ruwxta ótken ilajda qatnasıwshılar tárepinen bir qatar sorawlar berilip, olarǵa tiyisli qánigelerden juwaplar aldı. Sonıń menen birge, jergilikli isbilermenlerdiń bir qatar usınısları qabıl etildi.
Ilajǵa Qaraqalpaqstan Respublikası Joqarǵı Keńesiniń byudjet, ekonomikalıq reformalar, investiciyalar, innovaciya hám turizm máseleleri komitetiniń baslıǵı Berdibek Seytnazarov qatnastı.

Adilbay Orazov,
Qaraqalpaqstan xabar agentligi sholıwshısı