Qaraqalpaqstan Respublikasında diyqanshılıq etiletuǵın, atap aytqanda, paxta jetistiriletuǵın kópshilik maydanlarǵa elektr tarmaqları barmaǵan. Biraq, bul tórtkúlli diyqanlardıń suwdı únemleytuǵın texnologiyaların engizbewine sebep bolmay atır.

Tórtkúl rayonınıń «Janbasqala» awıl puqaralar jıyını aymaǵındaǵı «Jurabek SA» fermer xojalıǵınıń paxta atızında ótkerilgen kórgizbeli seminarda usılar haqqında sóz boldı.
Seminarda, Ózbekstan Respublikası Suw xojalıǵı ministrligi basqarma baslıǵı D.Kdırbaev, Qaraqalpaqstan Respublikası Suw xojalıǵı ministriniń birinshi orınbasarı A.Urazımbetov shıǵıp sóylep, rayondaǵı «Jurabek SA» fermer xojalıǵınıń suwdı únemlewshi texnologiyanı engiziw baǵdarındaǵı baslamaların basqalarǵa úlgi sıpatında atap ótti.
Sonday-aq, rayon hákimi orınbasarınıń qatnasıwında, «Suw jetkerip beriw xızmeti» mámleketlik mákemesi hám qurılıs shólkemleriniń juwapkerleri menen birgelikte rayonda suwdı únemlewshi texnologiyalardı engiziw boyınsha ámelge asırılıp atırǵan jumıslar hám keleshektegi wazıypalar dodalandı. Maǵlıwmat ushın, bul fermer xojalıǵı 33 gektar maydanǵa Qıtay texnologiyası tiykarında shigit egip, 825 million sumlıq óz qarjıları esabınan tamshılatıp suwǵarıw texnologiyasın engizmekte. Álbette, bul texnologiyanıń islewi ushın nasos agregatı zárúr, ol bolsa, elektr energiyası menen isleydi. Fermer xojalıǵı aǵzaları bul máselege de zamanagóy, alternativ usıldan paydalandı. Bul aymaqta elektr tarmaqları bolmaǵanı ushın 200 million sum esabınan 50 kilovattlıq quyash panellerin ornatdı.
Seminarda qatnasıwshılar suwdı únemlewshi texnologiya hám quyash panellerin ornatıw jumısları menen tanısıp, ózlerin qızıqtırǵan sorawlarǵa tiyisli juwapkerlerden juwap aldı.

Qaraqalpaqstan xabar agentligi