Prezidentimiz qararınıń orınlanıwın támiyinlew maqsetinde Ellikqala rayonında “Janar may-energetika tarawında mámleketlik qadaǵalawdı jetilistiriw máseleleri” atamasında májilis shólkemlestirildi. Bul májilis Bas prokuraturanıń Ellikqala rayonına biriktirilgen juwapker xızmetkeri F.Allambergenovtıń baslaması hám rayonlıq uyımlararalıq jumısshı topar aǵzalarınıń qatnasıwında ótkerildi, dep maǵlıwmat beredi hákimlik málimleme xızmeti.

Májiliste rayon hákimi V.Niyazimbetov, tarawlıq shólkemlerdiń basshıları, tiyisli kárxanalardıń juwapkerleri hám basqa da juwapkerler qatnastı. Sóylesiw dawamında energiya resursların únemlew, energiya nátiyjeliligin arttırıw, eki basqıshlı qadaǵalaw sistemasına ótiw, energiya balansı hám onıń kórsetkishleri, sonday-aq, únemlew baǵdarlamalarınıń orınlanıwın támiyinlew máseleleri hár tárepleme dodalandı.
Májilis sheńberinde rayonda ámelge asırılıp atırǵan jumıslar tallanıp, ayma-ay ekonomikalıq rejelerdiń orınlanıwı, gaz balansın qáliplestiriw, janılǵı hám energiya resurslarınan nátiyjeli paydalanıw jaǵdayı boyınsha jumısshı topar aǵzalarınıń esabatları tıńlandı.
“Dumanqala” máhállesinde jaylasqan “BUSTAN GOLD TEKSTIL” JShJda ámelge asırılıp atırǵan ilajlar úyrenildi. Iri kótere tutınıwshı esaplanǵan bul kárxanada janılǵı-energiya resurslarınan aqılǵa uǵras paydalanıw, energiya nátiyjeliligin arttırıwǵa qaratılǵan jumıslardıń jaǵdayı kórip shıǵıldı. Bar mashqalalar hám keleshektegi rejeler tıńlandı.
Sonday-aq, “BUSTAN GOLD TEKSTIL” JShJ tárepinen ornatılǵan 50 kVt quwatlılıqtaǵı quyash panelleri hám 300 kVar reaktiv energiyanı kompensaciyalaw úskeneleriniń islew jaǵdayı kózden ótkerildi. Juwapkerlerge anıq usınıs hám tiyisli kórsetpeler berildi.

Qaraqalpaqstan xabar agentligi