Nókis rayonı «Qutankól» MPJ aymaǵınan ótetuǵın avtomobil jolı biraz jıllardan berli avariyalıq jaǵdayǵa kelip qalǵan edi. Avtomobil aydawshılarǵa qolaysızlıqlardı tuwdırıp kiyatırǵan bul joldı qayta ońlaw ushın máhálle turǵınları rayon hákimligine múrájat penen shıǵıp hám bul másele unamlı sheshilip, házirgi waqıtta joldı qayta ońlaw jumısları alıp barılmaqta.

-Usı «Qutankól» MPJ aymaǵınan Shımbayǵa barıwshı úlken jolǵa shekem tutasıp ketetuǵın avtomobil jolın ońlap beriw boyınsha islegen múrájatımız unamlı sheshilgeni ushın júdá quwanıshlımız. Áyne payıtta jolǵa ıssı asfalt tóselip atır. Aymaǵımız turǵınları usı jol arqalı Shımbay rayonına kóp qatnaydı. Sonday-aq, joldıń bir shaqırım 800 metr jerin ońlawdı da baslamalı byudjetten utıp aldıq. Aldaǵı waqıtta onı da ońlaw rejelestirilmekte. Xojalıqlarǵa suw jetkerip beriw ushın joldıń eki boyındaǵı salmalardıń ishi beton menen qaplanbaqta. Álbette bulardıń bári mámleketimiz tárepinen xalıqtıń jaqsı turmıs keshiriwi ushın islenip atırǵan iygilikli isleri. Bul ushın biz el basshılarına minnetdarmız,-deydi máhálle turǵını, nuraniy S. Aqnazarov.

Qaraqalpaqstan xabar agentligi