Maǵlıwmatlarǵa qaraǵanda, ósimlikler biz qabıl etetuǵın azıq-awqattıń 80 procentin hám jutatuǵın kislorodtıń 98 procentin beredi eken. Búgingi kúnde olarǵa qorshaǵan ortalıqtıń pataslanıwı, klimat ózgeriwinen baslap zıyankeslerdiń tarqalıwına shekemgi kóplegen tásirler qáwip salmaqta.

Ósimliklerdiń salamatlıǵın qorǵaw ashlıqtı saplastırıwǵa, biologiyalıq kóptúrlilikti hám qorshaǵan ortalıqtı qorǵawǵa, ekonomikalıq rawajlanıwdı jedellestiriwge qanday járdem beretuǵını haqqında pútkil dúnyada xabardarlıqtı arttırıw maqsetinde BMSh 12-maydı Xalıqaralıq ósimlikler salamatlıǵın qorǵaw kúni dep járiyaladı.
– 12-may – Xalıqaralıq ósimliklerdi qorǵaw kúni, dep belgilenip, onıń maqseti – planetamız florasın saqlap qalıw hám biologiyalıq kóptúrlilikti qorǵaw ilajları haqqında xabardarlıqtı arttırıw bolıp tabıladı,-deydi Ósimlikler karantini hám qorǵaw agentliginiń Taqıyatas rayonlıq bólimi inspektorı Bahadır Shámshetov.
Azıq-awqat hám awıl xojalıǵı shólkemi (FAO) global turizm hám sawdanıń jedel rawajlanıwı nátiyjesinde ósimlikler ushın qáwipli organizmlerdiń tarqalıwı sıyaqlı mashqalaǵa xalıqaralıq jámiyetshiliktiń itibarın qaratpaqta. Zıyankesler biologiyalıq kóp túrlilik joǵalıwınıń tiykarǵı sebeplerinen biri, dep atap ótedi FAO.
Shólkem ekspertleri, atap aytqanda, teńiz konteynerleri hám júklerin tazalıqtı saqlaw arqalı ósimliklerdiń zıyankesleri hám kesellikleriniń tarqalıwın azaytıwǵa múmkinshilik beretuǵın ósimliklerdiń zıyanlanıwın azaytıw ilajların islep shıqpaqta.

Qaraqalpaqstan xabar agentligi