Xabarıńız bar, Mámleketimiz basshısı tárepinen 2022-jıldıń basında alǵa qoyılǵan baslama tiykarında Qaraqalpaqstan Respublikası hám wálayatlar oraylarında birewden mektep bajıxana uyımları tárepinen atalıqqa alınǵan bolıp, olarda bilim alıp atırǵan jaslardı milliy watansúyiwshilik ruwxında tárbiyalaw, olardıń huqıq qorǵaw uyımlarınıń jumısına qızıǵıwshılıǵın qáliplestiriw maqsetinde “Jas bajıxanashı” dógerekleri jumıs baslaǵan edi.

Oqıw jılı dawamında dógerek sheńberinde shólkemlestirilgen teoriyalıq oqıw-sabaqları bajıxana postlarına shıqqan halda ámeliy jaqtan bekkemlenbekte.
Mektepte oqıp atırǵan bir topar jaslar ushın “Nókis-aeroport” shegara bajıxana postında “Ashıq esikler kúni” shólkemlestirilip, onda oqıwshı jaslarǵa post jumısı, bajıxana shegaraları arqalı háreketleniw tártip-qaǵıydaları boyınsha ámeliy oqıw sabaqları ótkerildi.
Bajıxana qadaǵalawı hám bajıxana rásmiylestiriwi boyınsha oqıw-sabaqları dawamında berilgen teoriyalıq bilimler, bajıxana postındaǵı qadaǵalaw texnikalıq quralları, málimleme baǵdarlamalarınan paydalanıw perspektivaların ámeliy kórgen oqıwshılar ushın úlken kónlikpege aylandı hám bul sayaxat olardıń bajıxana uyımlarınıń jumısı haqqındaǵı túsinigin arttırıwǵa xızmet etti.
Xalıqaralıq aeroportlarda bajıxana qadaǵalawınıń ámelge asırılıwı, “qızıl” hám “jasıl” koridorlardıń áhmiyeti, skaner qurılmalarınıń imkaniyatları hám tallaw qábiletleri haqqında túsiniklerge iye bolǵan oqıwshılar, kóshpeli oqıw sabaǵı dawamında ózlerin qızıqtırǵan sorawlarǵa juwap aldı.
Ásirese, ámeliy oqıw procesinde profayling baǵdarında alǵan kónlikpelerin bekkemlew maqsetinde ótkerilgen jarıs-oyında oqıwshılar úlken qızıǵıwshılıq hám belsendilik penen qatnasıp, bajıxana tarawınıń keń kólemli jumısın sezdi.
Ushırasıw dawamında bajıxana xızmetkeriniń tórt ayaqlı joldası (xızmet iytleri) boyınsha da jáne bir márte túsinikler berilip, post kishi inspektor-kinologına biriktirilgen xızmet iyti járdeminde ámeliy shınıǵıwlar kórsetildi.

Qaraqalpaqstan xabar agentligi