9-may–Eslew hám qádirlew kúni

Qanlıkól rayonında 9-may–Eslew hám qádirlew kúni hám Ekinshi jer júzilik urısta erisilgen jeńistiń 80 jıllıǵı múnásibeti menen «Hásiretli ana» esteligi maydanında bayram ilajı boldı.
Onda rayon hákimi B.Sultanov jıynalǵanlardı bayram menen qutlıqlap, urıs maydanlarınan qaytpaǵan, usı tınısh zaman kúnlerge jetip kele almaǵan áziz insanlardı yad etip, sol dáwirdegi olardıń búgingi kún ushın islegen pidákerligin joqarı bahaladı.
Miynet frontı artında qatnasqanlarǵa ǵamqorlıq kórsetiw, olardı hár tárepleme qollap-quwatlawǵa ayrıqsha itibar qaratılıp atırǵanlıǵın atap ótip, jer júzilik urısta qurban bolǵanlardıń esteliklerine keń jámiyetshilik wákilleri gúlsheńberler qoydı hám húrmet kórsetildi.
Ilajda atap ótilgenindey, elimizde jasap atırǵan hár bir insan, ásirese, jaslar ushın – usı jurt, usı xalıq penen maqtanıwı, onıń keleshegi, abadanlıǵı jolında qayǵırıwı hám háreket etiwi eń ullı insanıylıq pazıyletlerden biri. Sebebi, hár qanday millettiń, xalıqtıń perzenti óz milletin, xalqın ulıǵlaw ushın jasawı kerek. Mine, usı ideya átirapında birlesken awızbirshilikli xalıqtı hesh qanday kúsh jeńe almaydı.
Ilaj rayondaǵı Jaslar seyili orayında dawam etti. Jaslardıń keleshekke isenimi, ruwxıy kóterińkiligi, berilip atırǵan imkaniyatlar deregi olar atqarǵan hár bir bayram ilajında kózge taslanadı.
Awızbirshilik, tınıshlıq hám abadanlıq nıshanı bolǵan Aqkepterler ashıq, tınısh aspanımızǵa ushırılıp, bayramǵa jáne de ózgeshe ruwxıy kóterińkilik baǵıshladı.

Qaraqalpaqstan xabar agentligi