Maǵlıwmatlarǵa qaraǵanda, 1939-1945-jılları bolıp ótken Ekinshi jer júzilik urısqa sol jılları dúnyada óziniń suverenlik statusına iye 74 mámlekettiń 62 elinen 127 millionnan aslam adam qatnasıp, sonıń 71 millionnan aslamı ómirden biymezgil kóz jumdı.

Sonıń ishinde, burınǵı Keńes Awqamı quramındaǵı Ózbekstannan 2 millionnan aslam azamatlar qatnasıp, sonnan 540 mıńǵa shamalası qaytıs bolǵan, 158 mıńı biydárek joǵalǵan, 50 mıńnan aslamı konclagerlerde misli kórilmegen qıynaw hám azaplar sebepli ómirden kóz jumǵan, 60 mıńnan aslamı mayıp bolıp qaytqan.

Ózbekstanlı ásker hám oficerlerden 214 mıńǵa shamalası jawıngerlik orden hám medallar menen sıylıqlanǵanı, 301 i Sovetler Awqamı Qaharmanı degen joqarı ataqqa, 70 ten aslamı úsh dárejedegi “Dańq” ordenine miyasar bolǵanı, álbette, elimiz wákilleri tárepinen urıs maydanlarında kórsetilgen mártliktiń joqarı ámeliy tán alınıwı bolıp esaplanadı.

Mámleketimiz urıs jıllarında fronttıń bekkem támiynat bazasına aylanǵanı, respublikamızdan sawash maydanlarına oǵada úlken muǵdarda áskeriy texnika, qural-jaraq, dári-dármaq, kiyim-kenshek, azıq-awqat hám basqa da zárúr ónimler jetkerip berilgeni sol qayǵılı dáwirdiń jáne bir umıtılmas betin quraydı.

Elimizdiń barlıq aymaqlarında bolǵanı sıyaqlı, 9-may – Eslew hám qádirlew kúni hám Ekinshi jer júzilik urısta erisilgen jeńistiń 80 jıllıǵı “Watannıń rawajlanıwı, tınıshlıǵı hám qorǵaw jolındaǵı qaharmanlıq umıtılmaydı” súreni astında respublikamız boylap keń túrde belgilendi.

Bayram múnásibeti menen Nókis qalasındaǵı “Hásiretli ana” esteligi maydanına mámleketlik hám jámiyetlik uyımlar, sonday-aq, keń jámiyetshilik wákilleri toplandı.

Qaraqalpaqstan Respublikası Joqarǵı Keńesiniń Baslıǵı A.Orınbaev bayram múnásibeti menen “Hásiretli ana” esteligine gúlsheńber qoyıp, Ekinshi jer júzilik urısta qaytıs bolǵanlardıń esteligine húrmet kórsetti. Sonday-aq, Qurallı Kúshler sistemasına kiriwshi strukturalar wákilleri, ministrlik, mákeme, shólkemler, keń jámiyetshilik wákilleri menen jaslar da estelikke gúl qoydı.

Bunnan keyin ilaj qatnasıwshıları Nókis qalasındaǵı “Watansúyiwshiler baǵı”nda áskeriy texnikalar hám qural-jaraqlardıń kórgizbesi, “Eslew úyi”nde ata-babalarımızdıń mártligi hám basqa da maǵlıwmatlar menen tanıstı.

Respublikamız kórkem óner sheberleriniń hám Nókis garnizonınıń áskeriy orkestri tárepinen atqarılǵan Watandı, sonday-aq, urıs jıllarındaǵı hám búgingi baxıtlı turmısımızdı jırlawshı qosıqlar atqarıldı.

Ilajǵa Qaraqalpaqstan Respublikası Ministrler Keńesiniń Baslıǵı F.Ermanov qatnastı.

Sonı ayrıqsha aytıp ótiwimiz kerek, hár jıldaǵıday bıyılǵı jılı da Ekinshi jer júzilik urısta qaza tapqan ata-babalarımızdıń esteligin mángilestiriw, búgin de qatarımızda turıp, Watanımızdıń abıray-mártebesin kóteriwge, jaslardı ruwxıy hám ádep-ikramlılıq jaqtan tárbiyalawǵa úles qosıp atırǵan veteranlarımızdı qádirlew maqsetinde keń kólemli ilajlar ámelge asırılmaqta. Atap aytqanda,  Ózbekstan Respublikası Prezidentiniń usı jıl 19-fevraldaǵı “Ekinshi jer júzilik urısta erisilgen jeńistiń 80 jıllıǵı hám Eslew hám qádirlew kúnine tayarlıq kóriw hám múnásip belgilew haqqındaǵı qararı tiykarında, “Watannıń rawajlanıwı, tınıshlıǵı hám qorǵaw jolındaǵı qaharmanlıq umıtılmaydı” súreni menen bayram ilajları ótkerilip, Ekinshi jer júzilik urıs qatnasıwshıları hám mayıplarına 10 mıń AQSh dolları muǵdarında, usı kategoriyaǵa teńlestirilgen shaxslarǵa 25 million sum, miynet frontı qatnasıwshılarına 3 million sumnan bir mártelik aqshalay sıylıqlar jáne “Ekinshi jer júzilik urıstaǵı Jeńistiń 80 jıllıǵı” yubiley medalları tapsırılǵanı húrmetli veteranlarımızǵa itibar hám ǵamqorlıqtıń jáne bir ámeliy kórinisi boldı.

Urıs veteranları hám mayıpları ushın medicinalıq hám sociallıq xızmetler, sonıń ishinde, patronaj xızmeti kórsetilmekte. Olar óz qálewi boyınsha sanatoriylerde emlenbekte.

Usı quwanıshlı kúnlerde xalqımız húrmetli kekselerimiz, urıs hám miynet veteranların zıyaratlap, olardıń pátiyasın almaqta.

Adilbay Orazov

Qaraqalpaqstan xabar agentligi sholıwshısı.