Xalqımızdıń eń aǵla pazıyletleriniń biri – jası úlken insanlarǵa húrmet kórsetiw bolıp esaplanadı. Óz ómirin Watannıń rawajlanıwı, xalıqtıń abadanlıǵı jolına baǵıshlaǵan nuraniylarımızdıń duwaları bereket dáregi, olardıń turmıslıq tájiriybeleri bolsa, búgingi jas áwlad ushın biybaha mektep bolıp esaplanadı.

Taxtakópir rayonı hákiminiń orınbasarı Sh.Bekturǵanov, rayonlıq Qorǵanıw isleri bólimi baslıǵı J.Sultanov hám Ayrıqsha jaǵdaylar bólimi baslıǵı D.Allaberganovlar 9-may – «Eslew hám qádirlew kúni» hám Ekinshi jer júzilik urıstaǵı jeńistiń 80 jıllıǵı múnásibeti menen Ózbekstan mákan puqaralar jıyınında jasawshı, ekinshi jer júzlik urıs jıllarında front artında miynet etken nuraniy anamız Biybixan Akimniyazovanıń halınan xabar alıp, oǵan húrmet belgisi sıpatında bayram sawǵaların tapsırdı.
Óz gezeginde, Biybixan apa da ózine kórsetilip atırǵan sıy-húrmet ushın Prezidentimizge hám respublikamız basshılarına tereń minnetdarshılıǵın bildirip, jaslarǵa óz alǵısın jawdırdı.

Qaraqalpaqstan xabar agentligi