Mámleketimiz basshısınıń 2024-jıl 28-fevraldaǵı «Ózbekstan texnikalıq jaqtan tártipke salıw agentliginiń jumısın shólkemlestiriw ilajları haqqında»ǵı qararı hám 2025-jıl 29-yanvardaǵı «Byudjet qarjılarınan paydalanıw ústinen finanslıq qadaǵalawdı kúsheytiw boyınsha qosımsha ilajlar haqqında»ǵı pármanınıń orınlanıwı sheńberinde Ózbekstan texnikalıq jaqtan tártipke salıw agentligin sanlı transformaciyalaw tarawında sistemalı jumıslar ámelge asırılmaqta.

Sonıń ishinde, Koreya xalıqaralıq birge islesiw agentligi (KOICA) hám Sanlı texnologiyalar ministrliginiń járdeminde «Texnikalıq tártipke salıw» milliy málimleme sisteması iske qosıldı hám Agentlik janındaǵı Arnawlı situaciyalıq orayı ashıldı.
Maǵlıwmat ornında aytıw kerek, «Texnikalıq tártipke salıw» milliy málimleme sisteması agentlik jumısınıń barlıq baǵdarların – standartlastırıw, metrologiya, sertifikatlastırıw, akkreditaciyalaw hám mámleketlik qadaǵalawdı qamtıp aladı hám barlıq processlerdi tolıq elektron túrge ótkeriw arqalı qaǵaz hújjet aylanısınan waz keshiwge xızmet etedi.
Sistema 12 funkcional modulden ibarat. Ol Bajıxana komiteti, Salıq komiteti, Birden-bir identifikaciya sisteması (OneID) sıyaqlı mámleketlik platformalar menen integraciyalanǵan. Bul bolsa arzalardıń jaǵdayın real waqıt rejiminde baqlaw, insan faktorın azaytıw hám barlıq processlerde ashıq-aydınlıqtı támiyinlew imkaniyatın beredi.
Sonıń menen birge, Arnawlı situaciyalıq oraydıń jumısı baslanadı. Ol «Texnikalıq tártipke salıw» málimleme sistemasınıń ekosistemasın turaqlı monitoring etiw wazıypaların atqaradı. Sonday-aq, tarawdaǵı qáwip-qáterler hám mashqalalardı anıqlaw hám tallaw, nızam buzıwshılıqlardı jedel anıqlaw hám qararlar qabıl etiw, 24/7 rejiminde sistemanı nátiyjeli basqarıw imkaniyatın beredi.
Bul baslamalardıń ámelge asırılıwı Ózbekstanda xalıqaralıq sapa standartlarına erisiw, global maydanda mámlekettiń abırayın arttırıwǵa xızmet etedi. Sonıń menen birge, Koreya Respublikası sıyaqlı xalıqaralıq sherikler menen birge islesiwdi bunnan bılay da bekkemlewde úlken áhmiyetke iye.

Sh.Mamaturopova, ÓzA