Beruniy rayonındaǵı “Eslew” maydanında “Eslew hám qádirlew kúni” hám Ekinshi jer júzilik urısta erisilgen ullı Jeńistiń 80 jıllıǵına baǵıshlanǵan saltanatlı ilaj bolıp ótti.

Ilajdı Beruniy rayonı hákimi I.Xidirov ashıp berip, urıs jıllarında sawash maydanlarında mártlik kórsetken, front artında pidayılıq penen miynet etken watanlaslarımız haqqında shın júrekten sóz etti. Ol óz sózinde:
– 9-may “Eslew hám qádirlew kúni” sıpatında keńnen belgileniwi dástúrge aylanǵan. Sawash maydanlarında janın pidá etken, front artında miynet etken, házir aramızda saw-salamat júrgen veteranlarımız – biz ushın tiri ápsana hám tariyx,-dep atap ótti.
Ilaj dawamında Beruniy rayonınan shıqqan márt jawıngerler – Orazbay Jumaniyazov, Aleksandr Danilovich Trashkov, Mırza Azimboev hám Jabbi Matniyazovlardıń atları ayrıqsha atap ótildi. Olar Ekinshi jer júzilik urıstıń awır kúnlerinde dushpanǵa qarsı mártlershe gúresip, janın pidá etken xalıq qaharmanları sıpatında “Sovet Awqamı Qaharmanı,” “Altın Juldız” hám “Qızıl Juldız” ordenleri menen sıylıqlanǵan.
Búgingi kúnde Beruniy rayonında urıs jıllarında front artında miynet etken 7 veteran jasamaqta. Olar Ózbekstan Respublikası Prezidentiniń qararına muwapıq Jeńistiń 80 jıllıǵına baǵıshlanǵan estelik yubiley medalı hám aqshalay sıylıqlar menen sıylıqlandı, – dep maǵlıwmat beredi Beruniy rayonı hákimligi Málimleme xızmeti bólimi baslıǵı A.Urazova.
Bayram ilajı dawamında mádeniyat xızmetkerleri tárepinen Watanımızdı jırlaytuǵın qosıqlar jańladı, saxnalıq shıǵıwlar kórsetildi. Sonday-aq, Hásiretli ana hám Awǵan jawıngeri esteliklerine gúller qoyıldı.
Bunday ilajlar jas áwladtı watansúyiwshilik ruwxında tárbiyalaw, ata-babalardıń mártligine húrmet ruwxın sińdiriwde úlken áhmiyetke iye.

Qaraqalpaqstan xabar agentligi