9-may – Eslew hám qádirlew kúni. Miyrim-shápáát, qádir-qımbat, ata-babalardıń ruwxına húrmet sıyaqlı xalqımızdıń eń aǵla pazıyletlerin ózinde jámlegen ullı bayram.

Mámleketimizdiń siyasiy maydanında óz ornına iye bolǵan Isbilermenler háreketi – Ózbekstan Liberal-demokratiyalıq partiyası búgingi tınısh hám paraxat turmısımız jolında ómiriniń náwqıran dáwirlerin urıs jalınlarında, sawash maydanlarında ótkergen insanlardıń mashaqatların, teńsiz mártlik sıpatında bahalaydı. Partiya ideyaları, maqset hám wazıypalarınıń tiykarında bárqulla ótkenlerdiń ruwxına húrmet kórsetiw hám qádirlew adamgershiliktiń joqarı qádiriyatlarınan biri ekenligi atap ótiledi.
Eslew – bul qádir-qımbat. Eslew – bul tariyx. Haqıyqatında da, keshegi kúnimiz ullıların yad etiw, xalqımızdıń keleshegi jolında janın pidá etken insanlardı eslew búgingi kúnimizdiń qádirine jetiwge, shúkirshilikke úyretedi. Pútkil elimizde «Watan abadanlıǵı, tınıshlıǵı hám onı qorǵaw jolındaǵı qaharmanlıq umıtılmaydı» súreni astında ekinshi jer júzilik urısta qolǵa kirgizilgen jeńistiń 80 jıllıǵı hám «9 may – Eslew hám qádirlew kúni» ulıwmaxalıqlıq bayram sıpatında keńnen belgilenbekte.
Sáne múnásibeti menen ÓzLiDeP Qaraqalpaqstan Respublikalıq Keńesi hám Xalıq deputatları Nókis qalalıq Keńesiniń deputatları hám “Jaslar qanatı” aǵzaları paytaxtımızdıń “Ámiwdárya” MPJ Qońırat kóshesinde jasawshı 100 jastı qarsılaǵan Ekinshi jer júzilik urıs veteranı Qadırbay ata Narmanovtıń shańaraǵında boldı.
Veteran ata tınısh kúnlerimizge shúkirshilik etip, partiya belsendilerine óziniń aq pátiyasın berdi
– Hár jılı 9-may – Eslew hám qádirlew kúni aldınan Ekinshi jer júzilik urıs qatnasıwshıları, front artı pidayılarınıń halınan xabar alıw partiyamız dástúrine aylanǵan, – deydi Xalıq deputatları Nókis qalalıq Keńesi deputatı Írıstı Quttımuratova. Bul kún tek ǵana urısta pidayılıq kórsetken qaharmanlardı eslew emes, al olardıń pidákerlik xızmetlerin qádirlew, jaslarǵa watansúyiwshilik ruwxın sińdiriw ushın da áhmiyetli.
Haqıyqatında da, Qádirbay atanıń ómir jolı tariyxıy haqıyqatlıqtı ózinde jámlegen bolıp, olarda mártlik, jigerlilik hám sabır-taqatlılıqtıń ayqın úlgilerin kóriw múmkin. Bunday sáwbetlesiwler, veteranlarǵa kórsetilgen itibar hám húrmet jaslarǵa ruwxıy tayanısh, kúsh-quwat baǵıshlap, olardı Watanǵa xızmet etiw, óz eline pidayılıq penen qaraw ruwxında tárbiyalaydı.

Qaraqalpaqstan xabar agentligi