Qaraqalpaqstan Respublikası sudınıń baslaması menen Ózbekstan Sawda-sanaat palatası Qaraqalpaqstan Respublikası basqarmasında «Tólewge qábiletsiz dep tabıw haqqındaǵı islerdi kóriwdiń ózine tán ózgeshelikleri: sud ámeliyatındaǵı mashqalalar hám olardıń sheshimi» atamasında oqıw-seminarı shólkemlestirildi.

Ilajǵa sudyalar, Qaraqalpaqstan Respublikası Mámleketlik salıq basqarması, prokuratura, mámleketlik aktivlerdi basqarıw agentligi Qaraqalpaqstan Respublikası basqarması, Bas prokuratura janındaǵı Májbúriy orınlaw byurosı Qaraqalpaqstan Respublikası basqarması, Ekonomikalıq jınayatlarǵa qarsı gúresiw departamenti Qaraqalpaqstan Respublikası basqarması, sud basqarıwshıları qatnastı.
Seminarda Qaraqalpaqstan Respublikası sudı baslıǵınıń orınbasarı, ekonomikalıq isler boyınsha sudlaw kollegiyasınıń baslıǵı B.Ktaybekov shıǵıp sóylep, tólewge qábiletsizlik (bankrotlıq) quramalı huqıqıy process bolıp, onı durıs alıp barıw juwapker taraw wákillerinen tereń bilim, tallaw qábileti hám ámeliy tájiriybe talap etiletuǵının atap ótti.
-Sebebi, sud ámeliyatında bankrotlıq isleriniń sanı artıp barıwı, ásirese, kishi hám orta biznes tarawlarında, bul máselege ayrıqsha itibar qaratıwdı talap etpekte,-deydi B.Qtaybekov.- «Tólewge qábiletsizlik haqqında»ǵı Ózbekstan Respublikası nızamı qarızdarlardıń finanslıq uqıplılıǵın anıqlaw hám olardıń tólewge qábiletsizligin durıs bahalaw imkaniyatın beredi. Sonlıqtan da, bul nızam normaların durıs hám anıq qollanıw tarawda júzege keliwi múmkin bolǵan hár qıylı mashqalalardıń aldın alıwǵa xızmet etedi.
-2025-jıldıń 1-mart jaǵdayına bola sudlardıń is júrgiziwinde saplastırıwǵa baylanıslı is júrgiziw múddeti bir jıldan ótken 82 tólewge qábiletsiz (bankrot) kárxana bolıp, bul kategoriyadaǵı isler ayırım jaǵdaylarda háreketsiz qaldırılǵan yamasa saplastırıwshı tárepinen aralıq hám juwmaqlawshı esabat usınıs etilmegen,» -deydi Qaraqalpaqstan Respublikası sudınıń sudyası A.Ayapov óz bayanatında.- Nızam talabına bola, hár sherekte aralıq esabat, jumıs juwmaqlanǵanda – juwmaqlawshı esabat tapsırılıwı shárt. Bankrotlıq processleriniń sozılıwı kreditorlardıń máplerine zıyan jetkeredi, ekonomikalıq aylanıstaǵı isenimdi tómenletedi hám biznes ortalıǵın túsiniksiz jaǵdayǵa keltiredi.
Ilajda tólewge qábiletsiz dep tabılǵan hám bir jıldan aslam múddet dawamında saplastırıw jumısları juwmaqlanbaǵan kárxanalardı saplastırıw boyınsha is halatları bul iske juwapker bolǵan shaxslardıń qatnasıwında hár tárepleme dodalandı.
Sonday-aq, Salıq kodeksi hám «Tólewge qábiletsizlik haqqında»ǵı nızam hám basqa da nızamnan kelip shıǵatuǵın hújjetler normaları menen islesiwde olardı ámelde durıs qollanıw, nızamshılıqta belgilengen processuallıq múddetlerge qatań ámel etiw, islerdi kórip shıǵıwda isbilermenlik subektleriniń nızamlı máplerine zıyan jetkermew hám júzege kelip atırǵan mashqalalı jaǵdaylardı nızam sheńberinde saplastırıw zárúr ekenligi hár tárepleme túsindirildi.
Ilaj sońında qatnasıwshılar tárepinen qánigelerge bir qatar sorawlar berilip, olarǵa juwap aldı.

Adilbay Orazov
Qaraqalpaqstan xabar agentligi