Usı jıl 7-may kúni “Bes baslama olimpiadası” sheńberinde bilim beriw mákemeleriniń muǵallimleri arasında “Salamat denede – sapalı bilim!” súreni astında Ózbekstan kásiplik awqamları Federaciyası Kubogi ushın ótkerilip atırǵan sport jarıslarınıń Qaraqalpaqstan Respublikalıq basqıshı ótkerildi.

Bul jarıslardı shólkemlestiriwden maqset – Ózbekstan Respublikası Prezidentiniń 2022-jıl 28-yanvardaǵı PF-60-sanlı pármanı menen tastıyıqlanǵan “2022-2026-jıllarǵa mólsherlengen Jańa Ózbekstannıń rawajlanıw strategiyası”nıń 67-maqsetinde belgilengen wazıypalardı ámelge asırıwdan, yaǵnıy, denetárbiya hám sport penen turaqlı shuǵıllanatuǵın puqaralardıń sanın arttırıw, bilimlendiriw shólkemleriniń xızmetkerlerin sport ilajlarına keńnen qamtıw, olardıń arasında jarıslar shólkemlestiriw, sport infrastrukturasın jaqsılaw hám zárúr sport inventarları menen támiyinlew, xızmetkerlerdiń fizikalıq belsendiligin arttırıw, bilimlendiriw shólkemlerindegi sport sekciyaları hám dógereklariniń jumısların rawajlandırıwǵa járdem beriw, muǵallimlerdiń bos waqıtlarında sport penen shuǵıllanıwı ushın qolaylı sharayatlar jaratıw bolıp esaplanadı.
Kubok ushın ótkerilgen sport jarısları Nókis qalası 1- hám 2-sanlı sport mektepleri, Ájiniyaz atındaǵı Nókis mámleketlik pedagogikalıq institutı, Berdaq atındaǵı Qaraqalpaq mámleketlik universiteti hám Jaslar orayında bolıp ótti.
Ilajda Ózbekstan kásiplik awqamları Federaciyası Qaraqalpaqstan Keńesi, Qaraqalpaqstan Respublikası Mektepke shekemgi hám mektep bilimlendiriwi ministrligi, Sport ministrligi hám Ózbekstan Jaslar isler agentligi Qaraqalpaqstan Respublikası basqarması wákilleri, tarawlıq kásiplik awqamları Qaraqalpaqstan Respublikası Keńesi baslıqları, juwapker shólkemlestiriwshiler hám tiyisli ministrliklerdiń wákilleri qatnastı.
Jarısta ótken basqıshlarda jeńimpaz bolǵan 17 komanda quramında
493 muǵallim hám ustazlar sporttıń ǵalabalıq túrleri bolǵan mini-futbol, shaxmat, shashka, stol tennisi hám voleybol túrleri boyınsha óz-ara kúsh sınastı. Bul jarıslardıń ótken basqıshlarında 17 mıńnan aslam bilimlendiriw mákemeleriniń xızmetkerleri qatnasqan edi.
Kún dawamında sport jarısları qızǵın ótip, jarıstıń barısı tájiriybeli tóreshiler tárepinen bahalanıp barıldı. Hár bir sport túrinen jeke jeńimpazlar hám jeńimpaz komandalar anıqladı.
Stol tennisi boyınsha hayal-qızlar arasında Taqıyatas rayonınan Yu.Xudaybergenova birinshi, Xojeli rayonınan J.Maxanova ekinshi, Tórtkúl rayonınan S.Bekchanova úshinshi, al erler arasında Ellikqala rayonınan I.Kurbanov birinshi, Ámiwdárya rayonınan D.Yuldoshev ekinshi, Beruniy rayonınan U.Mashalov úshinshi orındı iyeledi.
Shaxmat jarısı boyınsha hayal-qızlar arasında 1-orındı Shımbay rayonınan G.Bekmuratova, 2-orındı Ámiwdárya rayonınan N.Gaipova, 3-orındı Nókis qalasınan L.Urazalieva, erler arasında bolsa 1-orındı Kegeyli rayonınan A.Saparbaev, 2-orındı Ámiwdárya rayonınan A.Baltabaev , 3-orındı Shomanay rayonınan D.Jalǵasovlar iyeledi.
Sporttıń shashka túri boyınsha hayal-qızlar arasında 1-orındı Qońırat rayonınan D.Urazbaeva, 2-orındı Ellikqala rayonınan M.Babataeva, 3-orındı Taqıyatas rayonınan F.Bekimbetova, erler arasında 1-orındı Tórtkúl rayonınan X.Reimbaev, 2-orındı Xojeli rayonınan J.Saparov, 3-orındı Qaraózek rayonınan D.Tajimuratovlar iyeledi.
Komandalıq jarıslarda voleybol boyınsha hayal-qızlar arasında ótkerilgen jarıslarda Taxtakópir rayonı komandası birinshi, Nókis qalası komandası ekinshi, Moynaq rayonı komandası úshinshi, erler arasında bolsa Nókis qalası komandası birinshi, Shımbay rayonı komandası ekinshi, Qaraózek rayonı komandası úshinshi orındı iyeledi.
Sonıń menen birge, sporttıń mini-futbol túri boyınsha da jarıslar qızǵın bekllesiwlerge bay boldı. Onda 1-orındı Nókis qalası, 2-orındı Nókis rayonı, 3-orındı Kegeyli rayonı komandaları jeńip aldı.
“Ózbekstan kásiplik awqamları Federaciyası kubogi” sport jarıslarınıń Qaraqalpaqstan Respublikası basqıshında komandalıq esapta Nóis qalası birinshi, Taqıyatas rayonı ekinshi, Ámiwdárya rayonı úshinshi orınlardı iyeledi.
Ulıwma komandalıq esapta birinshi orındı iyelep jeńimpaz bolǵan Nókis qalası komandasına “Ózbekstan kásiplik awqamları Federaciyası kubogi” hám 30 million sumlıq aqshalay sıylıq tapsırıldı.
Sonday-aq, jeńimpaz bolǵan komandalarǵa hám hár qıylı nominaciya iyelerine Ózbekstan kásiplik awqamları Federaciyasınıń Qaraqalpaqstan Keńesi tárepinen diplom hám sawǵalar tapsırıldı.

Á.Jiyemuratov,
Qaraqalpaqstan xabar agentligi.