7-may – Ózbekstan Respublikası málimleme-kommunikaciya texnologiyaları tarawı xızmetkerleri kúni

Shınında da, búgingi kúnde zamanagóy ekonomikanıń eń perspektivalı tarawı esaplanǵan málimleme-kommunikaciya texnologiyaların rawajlandırıwǵa úlken áhmiyet qaratılmaqta.
Baylanıs xızmetkerleriniń kásiplik bayramın belgilew ushın 7-may sánesi biykarǵa tańlanbaǵan. 1895-jıl 7-may kúni Aleksandr Popov birinshi radiopriyomnikti joybarlastırdı hám sımsız baylanıs tiykarında birinshi seans ámelge asırıldı. Usı kún baylanısshılardıń kásiplik bayramın belgilewge tiykar bolıp, jıllar ótip baylanısshılardıń bul kúndi kásiplik bayramı sıpatında belgilewi dástúrge aylandı.
7-may – bul júz mıńlaǵan baylanısshılar, radiotexnik qánigeler, radio hám televidenie kanallarınıń xızmetkerleri, pochta xızmetkerleri, radiofizika fakultetleriniń oqıtıwshıları hám studentleriniń bayramı. Bul bayramdı jáne mámleketimizde júz berip atırǵan áhmiyetli waqıya-hádiyseler haqqında operativ málimlemelerdi jetkerip beriwshilerdiń de kásiplik bayramı, desek hesh qanday asıra aytqan bolmaymız.
Baylanısshılardıń kúndelikli mashaqatlı miynetin múnásip bahalaw ańsat emes. Bul, bárinen burın, turaqlı miynet, jańa qurallar hám maǵlıwmatlar jetkerip beriwdiń túrli usılların islep shıǵıw hám olardan paydalanıw degendi ańlatadı.
Prezidentimizdiń tiyisli pármanı menen (2023-jıl 24-may kúngi PF-76-sanlı pármanı) 7-may sánesi Ózbekstan Respublikası málimleme-kommunikaciya texnologiyaları tarawı xızmetkerleri kúni dep belgilendi.
Qaraqalpaq mámleketlik jas tamashagóyler teatrında Ministrler Kenesi hám Sanlı texnologiyalar ministrligi Qaraqalpaqstan Respublikası aymaqlık sektorı tárepinen bayramǵa baǵıshlanǵan ilaj shólkemlestirildi.
Oǵan respublikamızdaǵı hám Xorezm wálayatındaǵı baylanıs tarawı mákemeleriniń basshıları, qánigeleri, radiotexnik qánigeler, radiofizika fakultetleriniń oqıtıwshıları hám studentleri, taraw pidayıları qatnastı.
Ilajda Qaraqalpaqstan Respublikası Joqarǵı Keńesiniń Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komitetiniń baslıǵı M.Atamuratov hám basqalar shıǵıp sóylep, qatnasıwshılardı kásiplik bayramı menen qızǵın qutlıqlap, jaqsı tileklerin bildirdi.
Atap ótilgenindey, respublikamızda baylanıs tarawında ótken jılı hám bıyılǵı jıldıń birinshi sheregi dawamında bir qatar jumıslar ámelge asırıldı.
Atap aytqanda, mobil baylanıs tarmaqların keńeytiw ushın
168 jańa tayanısh bazalıq stanciya ornatıldı, 480 bazalıq stanciya modernizaciyalandı, aymaǵımızdaǵı 1123 elatlı punkttiń 99,6 procenti mobil baylanıs penen, 96,6 procenti keń polosalı mobil internet xızmetleri menen qamtıp alındı. Xalıqtı joqarı tezliktegi internet penen támiyinlew ushın 7,6 mıń kilometrlik optikalıq talshıqlı baylanıs kabeli tartılıp, onıń jámi uzınlıǵı 25,7 mıń kilometrge jetkerildi. Joqarı tezliktegi internetke jalǵanıw ushın 98,5 mıń portlar ornatılıp, olardıń sanı 392,9 mıńǵa jetkerildi hám paydalanıwshılardıń sanı 215 mıńnan astı.
Barlıq ulıwma bilim beriw mektepleri, balalar baqshaları, densawlıqtı saqlaw obektleri, puqaralar jıyınları hám profilaktika inspektorları xanaları joqarı tezliktegi internet penen támiyinlendi hám málimleme sistemaları tartıldı.
Sonday-aq, IT tarawında qánigeler tayarlawdı ele de jetilistiriw, programmalıq ónim islep shıǵarıwshılardı qollap-quwatlaw maqsetinde tazadan qurılǵan 17 qabatlı IT park filialınıń imaratı paydalanıwǵa tapsırıldı.
Ótken 2024-jıldıń I sheregi dawamında Qaraqalpaqstan Respublikası boyınsha kórsetilgen baylanıs hám málimlemelestiriw xızmetleriniń kólemi 192,8 mlrd. sumdı quraǵan bolsa, bıyılǵı jıldıń usı dáwirinde 298,9 mlrd. sum¬ǵa jetkerildi. Bul ótken jılǵa salıstırǵanda 1,55 esege kóp.
Ilajda bir qatar taraw pidayıları, veteranlar húrmet jarlıqları, kókirek belgileri hám bahalı estelik sawǵaları menen xoshametlendi.
Ilaj kórkem óner sheberleriniń atqarıwındaǵı koncert baǵdarlaması menen dawam etti.

Á.Jiyemuratov,
Qaraqalpaqstan xabar agentligi