Hár jılı 9-may sánesi jurtımızda úlken húrmet hám qádirlew menen belgilenedi. Bul sáne –Eslew hám qádirlew kúni sıpatında xalqımız qálbinde tereń iz qaldırǵan, tariyxıy eslewlerdi janlandırǵan, qaharmanlıq hám sabır-taqat tımsalına aylanǵan kekselerimizdi yadqa alıp, olardıń xızmetlerin ardaqlaw kúni esaplanadı.

Bayram qarsańında Ámiwdárya rayonı hákimi Sabır Xojametov basshılıǵındaǵı rayon basshıları hám respublikalıq jumısshı topar juwapkerleri Ekinshi jer júzilik urıs qatnasıwshıları, húrmetli jası úlken ata hám analardıń jaǵdayınan xabar alıp, olardı jeńistiń 80 jıllıǵı menen qutlıqlap, bayram sawǵaların tapsırdı.
Doslıq máhállesinde jasawshı nuraniy ana Orazgúl Madaminova bıyıl 95 jastı qarsı almaqta. Rayon hákimi S. Xojametov nuraniy anaǵa Prezidentimizdiń arnawlı qararı menen shólkemlestirilgen «Ekinshi jer júzilik urıstaǵı jeńistiń 80 jıllıǵı» estelik yubiley medalın hám bahalı sawǵalardı tapsırdı. Óz gezeginde nuraniy ana bul húrmet-izzet ushın Prezidentimizge minnetdarshılıǵın bildirip, aq pátiyasın berip, elimizde tınıshlıq hám baxıtlı kúnler máńgige bolıwın tiledi.

Qaraqalpaqstan xabar agentligi