9-may – Eslew hám qádirlew kúni

9-may – Eslew hám qádirlew kúni mámleketimiz boylap milliy qádiriyat, eslew hám minnetdarshılıq ruwxında keńnen belgilenbekte. Usı sáne aldınan Ózbekstan “Adolat” social-demokratiyalıq partiyası Qaraqalpaqstan Respublikası Keńesiniń baslıǵı N.Qayıpbergenov Nókis qalasında jasawshı urıs veteranı Qádirbay Narmanovtıń shańaraǵında boldı.
Qadirbay Narmanov – bir ásirlik ómir jolın basıp ótken, jankúyer, sabır-taqatlı insan. Ol jankúyerligi hám watansúyiwshiligi menen tek ǵana urıs frontında emes, al keyingi jılları miynet frontında da pidákerlik penen xızmet etken. Onıń yadında saqlanǵan urıs jıllarınıń awır kúnleri, xalıqtıń sabır-taqatı, awızbirshiligi hám birgelikte kórsetken mártligi – búgingi áwlad ushın sheksiz sabaq bolıp esaplanadı.
Ushırasıw waqtında Qádirbay ata urıstıń ayanıshlı aqıbetlerin aytıp berdi. Onıń aytıwınsha, búgingi tınısh hám abadan turmıs – ótmishtegi pidayılıqlar, jan pidákerlikleri arqalı qolǵa kirgizilgen úlken jemis ekenin ayrıqsha atap ótti. Tınıshlıqtıń qádirin biliw – hár bir insannıń minneti sonday-aq, hámmemiz shúkirshilikti umıtpawımız kerek, – dedi ol qızǵın sáwbet waqtında.
Partiya basshısı urıs veteranın bayram múnásibeti menen qızǵın qutlıqlap, estelik sawǵaların tapsırdı. Ushırasıw dawamında nuraniy atanıń densawlıǵına da itibar qaratılıp, medicinalıq tekseriw de shólkemlestirildi. Medicina xızmetkerleri Qadirbay atanıń ulıwma salamatlıǵı boyınsha zárúr usınıslar berip, profilaktikalıq járdem kórsetti.
Álbette, bunday ushırasıwlar, bárinen burın, jas áwladtıń ruwxıy tárbiyasında úlken áhmiyetke iye. Mámleketimiz tárepinen bildirilgen búgingi joqarı itibar – ótmishke húrmet, búginge ǵamxorlıq, keleshekke bolsa juwapkershilik belgisi bolıp esaplanadı.

Qaraqalpaqstan xabar agentligi