Mámleketimiz basshısınıń «Ishki isler uyımları sistemasın sanlı transformaciyalaw boyınsha kompleksli ilajlar haqqında»ǵı qararı qabıl etildi.

Bul hújjette ishki isler uyımlarınıń málimleme infrastrukturasın birden-bir sistemaǵa birlestiriw, kriminogen jaǵdaylardı tallawdı avtomatlastırıwǵa ayrıqsha itibar qaratılǵan.
Ishki isler uyımları quramında Sanlı texnologiyalar hám huqıqıy statistika departamenti jáne onıń aymaqlıq bólimleri shólkemlestiriledi. Olarǵa sanlı sheshimlerdi engiziw hám muwapıqlastırıw, elektron mámleketlik xızmetlerdi jetilistiriw, málimleme qáwipsizligin támiyinlew sıyaqlı wazıypalar júklendi.
Bul ishki isler uyımları hám sanlastırıw tarawı qánigeleri menen birgelikte ámelge asırıladı.
-Ishki isler uyımları sistemasın sanlastırıw, jańa basqıshqa alıp shıǵıw wazıypası qoyıldı,-dedi Sanlı texnologiyalar ministrligi málimleme sistemaları hám uyımlararalıq integraciya bólimi baslıǵı Bobur Allaberganov. –Jámiyetlik qáwipsizlikti támiyinlew hám jınayatshılıqqa qarsı gúresiw tarawına jasalma intellekt texnologiyaların keńnen tartıw maqsetinde búgingi kúnge shekem tarawda bir qatar sanlı jumıs jolǵa qoyılǵan.
Mısalı, 2022-2024-jılları ishki isler uyımları tarawına 33 málimleme sisteması engizildi. Basqa uyımlardan 240 tan aslam maǵlıwmatlar bir-birine baylanıstı, 39 túrdegi mámleketlik xızmetler sanlastırıldı. Bul tarawdaǵı jumıstıń kópshilik bólegi sanlastırılǵanı hám xalıqqa hám yuridikalıq táreplerge bul xızmetlerden elektron kórinisinde paydalanıw imkaniyatı jaratılǵanın bildiredi.
Nátiyjede birden-bir interaktiv mámleketlik xızmetler portalı arqalı áne, usı ishki isler uyımları tarawına tiyisli 14 millionǵa shamalas xızmet kórsetilgen. Mısalı ushın turaqlı jasaw ornı haqqındaǵı maǵlıwmatnama beriw xızmetinen 17 mıń márte paydalanılǵan.
Bunnan tısqarı, avtotransport aynalarınıń reńin ózgertiw ruqsatnamasın beriw, pasporttı ID-kartaga ózgertiw, jasaw ornına turaqlı dizimge alınıw sıyaqlı arzalardı jiberiw xızmetlerinen paydalanıw ushın tek ǵana 10 minut waqıt jumsalmaqta. Aldın bul xızmetlerden paydalanıw ushın ishki isler uyımı imaratına barıw, qosımsha hújjetlerdi kórsetiw, gezek kútiw sıyaqlı áweregershiliklerdi bastan keshiriwge tuwra keletuǵın edi.
Mámleketimiz basshısınıń jańa qararı menen bul boyınsha jumıslar jáne de jetilistirildi.
Qararǵa bola, ishki isler uyımları jumısın 2025-2027-jılları sanlı transformaciyalawdıń tórt tiykarǵı baǵdarı belgilendi.
Barlıq málimleme sistemaları búgingi kúnde engizilgen maǵlıwmatlar bazaları, maǵlıwmatlardı qayta islew oraylarınıń jasalma intellekt texnologiyaları tiykarında birden-bir sistemaǵa birlestirgen halda jınayatshılıqqa qarsı gúresiw boyınsha jumıs nátiyjeliligi jáne de arttırıladı.
Tarawdıń sanlı jumısın basqarıw sisteması arqalı jumıs islew mexanizmleri muwapıqlastırıladı. Olardıń quramında joqarı mamanlıqtaǵı qánigelerden joqarı sanlı komanda qáliplestiriledi.
Sonday-aq, jınayatlar hám hákimshilik huqıqbuzarlıqlar statistikası insan faktorısız júrgiziledi.
Huqıqıy statistika hám operativ esabat maǵlıwmatları menen islesiw procesi tolıq sanlastırıladı. Bul bolsa, ishki isler uyımları xızmetkerleriniń jınayatshılıqqa qarsı gúresiw waqtında jumsalǵan waqıtların azaytıwǵa alıp keledi. Sistemada málimleme qáwipsizligi nátiyjeliliginiń zaman talaplarına sáykesligi támiyinlenedi.
Bunnan tısqarı, ishki isler uyımları sistemasın sanlastırıw maqsetinde bir qatar tiykarǵı wazıypalar belgilep berildi. Máselen, tarawǵa zamanagóy joqarı texnologiyalardı engiziw hám málimleme qáwipsizligin támiyinlew, sonday-aq, aymaqlıq ishki isler uyımları jumısınıń infrastrukturasın qáliplestiriw baǵdarında 18 úlken tiykarǵı joybar belgilendi.
Xalıqqa 10 mámleketlik xızmetti kriaktiv hám kompozit túrinde kórsetiw baǵdarlaması islep shıǵıladı. Onda ishki isler jumısına baylanıslı mámleketlik xızmetten paydalanǵanda puqara bir márte múrájat etkende tek ǵana bir xızmetten emes, al basqa túrdegi xızmetlerden de biymálel paydalanıwı múmkin boladı.
Ishki isler uyımlarınıń málimleme sistemalarına integraciyalanatuǵın 10 uyımnıń maǵlıwmatları dizimi qáliplestiriledi. Bul processte ishki isler uyımlarına usınılatuǵın maǵlıwmatlardı basqa mámleketlik shólkemlerden alıp kelmesten, málimleme sistemalarınan avtomatik túrde alıw imkaniyatı jaratıladı.
Sonday-aq, ishki isler uyımlarınıń jumısına jasalma intellektti engiziw hám onı rawajlandırıw koncepciyası tastıyıqlanadı. Sanlı texnologiyalar ministrliginiń koncepciyasınan kelip shıqqan halda 2025-2027-jıllarǵa mólsherlengen mánzilli ilajlar baǵdarlaması tastıyıqlanıwı názerde tutılmaqta.

ÓzA