Qaraqalpaqstan Respublikası Joqarǵı Keńesiniń Baslıǵı Amanbay Orınbaev Saudiya Arabstanınıń «ACWA Power» kompaniyasınıń Ózbekstandaǵı wákilxanasınıń basshısı Jon Zaidi basshılıǵındaǵı delegaciya menen ushırastı.

Onda respublikamızdaǵı Ústirt tegisliginde qurılısı baslanıwı aldında turǵan samal elektr stanciyası joybarın ámelge asırıw, bul baǵdarda kompaniya jumısların alıp barıwdı qollap-quwatlaw máseleleri sóz etildi.
Maǵlıwmat ushın atap ótetuǵın bolsaq, Prezidentimizdiń tapsırması menen Saudiya Arabstanınıń “ACWA Power” kompaniyası tárepinen respublikamızda ámelge asırılıp atırǵan «Samal elektr stanciyasın shólkemlestiriw» joybarınıń Qaraózek rayonı Qoybaq APJ aymaǵında qurılıp atırǵan «Nókis-1» joybarınıń bir qatar jumısları tamamlanǵanı boyınsha aldın xabar berilgen edi.
“Nókis-1” joybarı tolıq iske túsiwi nátiyjesinde hár jılı 350 mln. kilovat/saat elektr energiyası islep shıǵarılıwına imkaniyat jaratıladı, ortasha 100 mln. kub tábiyǵıy gaz únemlenedi, hawaǵa 180 mıń tonna karbonat andigrid gazi shıǵındılarınıń tarqalıwı azayadı.
Bunnan tısqarı, Qaraózek rayonı Qoybaq APJ aymaǵında jáne bir «Nókis-2» joybarı da ámelge asırılıp, 26 samal turbina generatorları qurıladı.
Prezident qararı menen «ACWA Power Company» (Saudiya Arabstanı) kompaniyası tárepinen Qońırat rayonında da samal elektr stanciyası hám elektr uzatıw tarmaǵı qurılıwı belgilenip, joybar sheńberinde «ACWA Power KRPK Wind» JShJǵa tiykar salınǵan edi.

Qaraqalpaqstan xabar agentligi