Házirgi kúnlerde Qıtaydıń Guanchjou qalasında «China Import and Export Fair» 137-xalıqaralıq kórgizbesi bolıp ótpekte. Bul retki ilajda «Wzcharmsanoat» associaciyasınıń baslıǵı Akbar Sultonov basshılıǵındaǵı delegaciya mámleketimiz atınan belsene qatnaspaqta.

Oǵan dúnyanıń júzlegen mámleketlerinen mıńlaǵan kompaniyalar qatnaspaqta. Áhmiyetlisi, Ózbekstan delegaciyası óziniń milliy ónimleri, yaǵnıy bılǵarı, ayaq kiyim hám aksessuarlar menen kórgizbe qatnasıwshılarında úlken qızıǵıwshılıq oyattı.
Sapar dawamında delegaciya bir qatar abıraylı Qıtay kompaniyalarınıń wákilleri menen ushırasıw ótkerdi. Olardıń arasında teri sanaatında jetekshi esaplanǵan «Qifeng Leather» kompaniyası shiyki zat jetkerip beriw hám jańa materiallar boyınsha birge islesiw usınısın alǵa qoydı. Sonday-aq, «MUDIYA» hám «Jinjiang Mudiao Shoes» sıyaqlı kompaniyalar menen Ózbekstanda birgeliktegi kárxanalardı shólkemlestiriw, zamanagóy dizayn hám oqıw laboratoriyaların jolǵa qoyıw boyınsha joybarlar dodalandı.
Bunnan tısqarı, «Trimax International» kompaniyasınıń wákilleri menen logistika, eksport infrastrukturası hám sanlastırılǵan bajıxana sistemaları boyınsha pikir alısıldı. Qıtay islep shıǵarıwshıları tárepinen «Made in Uzbekistan» brendin xalıqaralıq bazarǵa alıp shıǵıw, birgelikte jańa óndirislik quwatlıqlardı jaratıw boyınsha da usınıslar berildi.
“Wzcharmsanoat” delegaciyası tárepinen Ózbekstandaǵı klasterler, arnawlı sanaat zonaları, investorlar ushın jaratılǵan qolaylı sharayatlar hám bılǵarı ayaq kiyim sanaatı potencialı haqqında prezentaciyalar ótkerildi.
Bul kórgizbe texnologiyalıq jetiskenlikler, sawda tendenciyaları hám sanaatta birge islesiwdiń perspektivaları boyınsha pikirlesiw platforması sıpatında da áhmiyetli ekenin atap ótiw kerek.
Associaciya málimleme xızmetiniń xabarına bola, «Canton Fair» (China Import and Export Fair) Qıtaydaǵı eń iri xalıqaralıq kórgizbelerden biri bolıp, ol birinshi márte 1957-jılı Guanchjou qalasında ótkerilgen. Hár jılı báhár hám gúz máwsimlerinde eki márte shólkemlestiriletuǵın bul abıraylı ilaj Qıtay sırtqı sawdasınıń «aynası» bolıp tabıladı. Kórgizbe Qıtay Sawda ministrligi hám Guandun wálayatı húkimetiniń baslaması menen shólkemlestiriledi.

ÓzA