Ámiwdárya rayonınıń Aq altın awıl puqaralar jıyınında jaylasqan «Yakupova Gavhar» fermer xojalıǵında ǵawasha tárbiyasına baǵıshlanǵan kórgizbeli seminar ótkerildi.

Seminarǵa Qaraqalpaqstan Respublikası Joqarǵı Keńesiniń komitet baslıǵı A.Jumanazarov, Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev, Ózagroinspekciyanıń Qaraqalpaqstan Respublikası basqarmasınıń baslıǵı A.Yusupov, rayon hákimi S.Xojametov hám fermer xojalıqlarınıń baslıqları qatnastı.
Seminarda ǵawashalardıń qatar araların islew, tereń jumsartıw, azıqlandırıw hám suspenziya sebiw jumısların nátiyjeli shólkemlestiriw boyınsha pikir alısıwlar bolıp ótti. Tájiriybeli qánigeler tárepinen berilgen másláhátler fermerlerge óz xojalıqlarında ónimdarlıqtı arttırıw, sapalı zúráát alıw hám ósimliklerdi keselliklerden qorǵawda úlken járdem beredi.
Sonday-aq, Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev tárepinen awıl xojalıǵı tarawında mámleket tárepinen qollap-quwatlanıp atırǵan baǵdarlamalar hám imkaniyatlar haqqında maǵlıwmat berildi.
-Rayonımız boyınsha bıyılǵı jılı 16000 gektar jerge shigit egilip, onnan bir tegis nál alındı,-deydi Ámiwdárya rayonı awıl xojalıǵı bólimi baslıǵınıń orınbasarı Qudrat Abduxaliqov.-Sonıń 10 mıń gektar jerine kultivaciyalaw hám azıqlandırıw jumısları júrgizilip, qalǵan maydanlarda da bul isler dawam ettirilmekte. Sonday-aq, házirgi waqıtları ǵawashalardı birlew, otaw hám qatar araların jumsartıw jumısları júrgizilmekte. Oǵan 153 arnawlı texnika hám agregatlar qatnaspaqta.
Seminar dawamında fermer xojalıqlarınıń basshıları óz-ara tájiriybe almasıp, óz xojalıqlarında qollanılatuǵın túrli agrotexnikalıq usıllar hám texnologiyalar haqqında aytıp berdi.

Adilbay Orazov,
Qaraqalpaqstan xabar agentligi sholıwshısı.