Mádeniyat awıl puqaralar jıyını Qaraózek rayonındaǵı eń iri elatlardıń biri bolıp esaplanadı. Sońǵı jılları elimizdiń barlıq aymaqlarında bolǵanı sıyaqlı, bul jıyın aymaǵında da iri ózgeris hám jańalanıwlar júz berip, xalıqtıń turmısı abadanlasıp barmaqta. Xalıqtıń tınısh hám abadan turmısta jasawında ózin-ózi basqarıw uyımlarınıń atqarıp atırǵan xızmeti ayrıqsha. Sonlıqtan bunıń áhmiyetin jaqsı túsingen aymaq turǵınları awıl puqaralar jıyını baslıǵı lawazımına ótkerilip atırǵan saylawlarǵa belsene qatnastı.

Belgilengen nızamǵa muwapıq, aymaqta saylawdı ótkeriwge kómeklesiwshi jumısshı topar baslıǵı Sayıpnazar Smaylov tárepinen májilis ótkerilip, onda awıl puqaralar jıyını baslıǵı lawazımına talabanlar aymaqtı kelesi bes jıllıqta sociallıq-ekonomikalıq jaqtan rawajlandırıw boyınsha ózleriniń saylawaldı baǵdarlaması menen keń túrde shıǵıp sóyledi.
Bunnan soń májiliske qatnasqan 508 aymaq wákilleri tárepinen awıl puqaralar jıyını baslıǵı lawazımına talabanlarǵa jasırın dawıs beriw bolıp ótip, puqaralar emin-erkin ózleri tańlaǵan talabanlarǵa dawıs berdi.
Ádillik hám demokratiyalıq principler tiykarında ótkerilgen saylaw juwmaǵında, Mádeniyat awıl puqaralar jıyını baslıǵı bolıp, bunnan aldın da usı lawazımda islep kiyatırǵan Dawletbay Atajanov qasındaǵı talabanlardan kóp dawıs toplap, jıyın baslıǵı lawazımına jáne bir márte saylandı.
Rayon aymaǵında búgingi kúni puqaralar jıyını baslıqları saylawı shólkemleskenlik penen bolıp ótpekte.

Adilbay Orazov,
Qaraqalpaqstan xabar agentligi sholıwshısı