Elimizdiń barlıq aymaqlarında bolǵanı sıyaqlı, Taxtakópir rayonında da puqaralar jıyını baslıqlarınıń saylawı baslap jiberildi.

Atap aytqanda, belgilengen kestege muwapıq, Taxtakópir rayonında saylawdı ótkeriwge kómeklesiwshi komissiya tárepinen eń dáslepki saylawlar Taxtakópir posyolkalıq puqaralar jıyını hám Ǵárezsizlik mákan puqaralar jıyınlarında bolıp ótti.
Ózbekstan Respublikasınıń «Puqaralar jıyını baslıǵın saylaw haqqında»ǵı Nızamı tiykarında ótkerilgen saylawlar juwmaǵında, bunnan aldın da jıyın baslıǵı bolıp islep kiyatırǵan Aysanem Joldasbaevna Alliyarova Taxtakópir PPJ, Salawat Ayapbergenovich Nurlıbekov Ǵárezsizlik MPJǵa jańadan baslıq etip saylandı.
– Rayonımız boyınsha 17 mákan hám awıl puqaralar jıyınında puqaralar jıyını baslıqları saylanadı,-deydi Taxtakópir rayonında saylawdı ótkeriwge kómeklesiwshi komissiya baslıǵınıń orınbasarı Niyetbay Ayımbetov.-Búgingi kúnge shekem Aydın jol, Dáwir, Ózbekstan mákan puqaralar jıyını hám Qaraoy awıl puqaralar jıyınlarında saylawlar ótkerilip, aymaq turǵınları ózleriniń qálewlisin sayladı. Aldaǵı waqıtları da rayonımız aymaǵında puqaralar jıyını baslıqları saylawı belgilengen kestege muwapıq nızam tiykarında ótkerile beredi.

Adilbay Orazov,
Qaraqalpaqstan xabar agentligi sholıwshısı