Oraylıq Aziya xalıqaralıq institutı (OAXI) direktorı Javlon Vahobov Kuveyt universiteti Siyasiy pánler kafedrası baslıǵı, Arab qoltıǵı mámleketleri Birge islesiw keńesi Joqarǵı keńesi másláhát kollegiyası aǵzası doktor Hayla Al-Mikaymiy menen ushırasıw ótkerdi.

Sóylesiw dawamında tárepler 2025-jıl 21-22-aprel kúnleri Tashkent qalasında OAXI hám «Bourse & Bazaar» qorı birgelikte shólkemlestirilgen «Oraylıq Aziya – Arab qoltıǵı mámleketleri Birge islesiw keńesi» ekspertler forumı juwmaǵın kórip shıqtı. Mırza Al-Mikaymiy ánjuman nátiyjesin joqarı bahalap, ekspertler esabatına kirgiziw ushın áhmiyetli usınıslar bildirdi.
Ushırasıw waqtında OAXI hám Kuveyt universiteti arasındaǵı ilimiy-akademiyalıq birge islesiw máselesine ayrıqsha itibar qaratıldı. Atap aytqanda, siyasattanıwshılıq, ekonomika, mádeniyat, bilimlendiriw hám regionalararalıq baylanıslar tarawlarında birgelikte izertlew alıp barıw, ekspertler almasıwı hám óz-ara akademiyalıq baǵdarlamalardı jolǵa qoyıw perspektivası dodalandı.
Atap ótiliwinshe, óz-ara birge islesiwdi bekkemlew hár eki mákemeniń ilimiy imkaniyatın arttırıp, regionallıq birge islesiwdi tereńlestiriwge xızmet etedi.
Doktor Hayla Al-Mikaymiy – siyasiy ilimler professorı, Qoltıq mámleketleriniń turmısı, hayal-qızlardıń siyasiy belsendiligi hám regionallıq birge islesiw máseleleri boyınsha jetekshi ekspert bolıp esaplanadı. Akademik birge islesiwdi rawajlandırıwǵa qaratılǵan xalıqaralıq baslamalarda belsene qatnasıp keledi.

Ǵ.Xonnazarov, ÓzA