Usı jıldıń 13-15-may kúnleri Tashkent qalasındaǵı «CAEx Uzbekistan» xalıqaralıq kórgizbeler orayında mámlekettiń eń iri sanaat waqıyalarınan biri – «Ózbekstan energetika hápteligi – UEW 2025» bolıp ótedi.
Bul abıraylı ilaj sheńberinde bir qatar iri xalıqaralıq kórgizbe hám konferenciyalar shólkemlestiriledi. Atap aytqanda, «Ózbekstan neft hám gazi – UEW 2025» 27-xalıqaralıq kórgizbesi hápteliktiń tiykarǵı waqıyalarınan biri sıpatında ótkeriledi.

Bul haqqında «Iteca Exhibitions» xalıqaralıq kórgizbe kompaniyasınıń joybar direktorı Lola Ziyovuddinova ÓzAnıń xabarshısına tómendegilerdi aytıp berdi:
– Bizge belgili, neft hám gaz tarawı Ózbekstan ekonomikasınıń jetekshi tarmaqlarınan biri bolıp esaplanadı. Mámleketimiz basshısı usı tarawdı rawajlandırıwǵa ayrıqsha itibar qaratıp atırǵanı nátiyjesinde tarawdı túp-tiykarınan modernizaciyalaw, jańa kánlerdi izlew hám bar rezervlerdi ózlestiriw jumısları jedel ámelge asırılmaqta. Bul processte ekologiyalıq turaqlılıq hám óndiris qáwipsizligi máselelerine de ayrıqsha áhmiyet qaratılmaqta.
Bunday jumıslarda «Ózbekstan neft hám gazi – OGU 2025″ 27-xalıqaralıq kórgizbesi áhmiyetli rol atqaradı. Bizge belgili, 1997-jıldan berli ótkerilip kiyatırǵan OGU kórgizbesi tek ǵana zamanagóy úskeneler hám texnologiyalardı kórsetiw emes, al tarawdaǵı jetekshi islep shıǵarıwshılar, taw-kán sanaatı kárxanaları, mámleketlik uyımlar hám isbilermen toparlardıń wákilleri arasında nátiyjeli sóylesiw ushın áhmiyetli platforma wazıypasın atqarıp kelmekte.

Dástúrge bola, kórgizbe sheńberinde abıraylı jergilikli hám sırt el ekspertleri, taraw jetekshileriniń qatnasıwında Xalıqaralıq neft hám gaz konferenciyası da ótkeriledi.
Sonday-aq, háptelik sheńberinde «Power Uzbekistan 2025» – energetika, energiyanı únemlew, atom energetikası hám alternativ energiya dáreklerine baǵıshlanǵan 18-xalıqaralıq kórgizbe, «GETCA 2025» – jasıl hám energiya únemlewshi texnologiyalarǵa qánigelestirilgen arnawlı kórgizbe bólimi, 5-xalıqaralıq energetika konferenciyası ótkeriledi.

Házirgi waqıtta 420 kompaniya hám brend, 90 bayanatshı hám 1 420 delegat usı ilajǵa qatnasatuǵının rásmiy tastıyıqlaǵan. Bul bolsa, Ózbekstan energetika hápteligi tek ǵana regionallıq emes, al dúnya kólemindegi áhmiyetli sanaat waqıyası sıpatında qaralıp atırǵanınan dárek beredi.
Itibarlı tárepi, qatnasıwshılar geografiyası da júdá keń, yaǵnıy bul ret 32 mámleketten wákiller qatnasıwı kútilmekte. Atap aytqanda, Avstriya, Ázerbayjan, Belarus, Ullı Britaniya, Germaniya, Gruziya, Daniya, Hindstan, Iran, Italiya, Qazaqstan, Qıtay, Koreya Respublikası, Ózbekstan, Qırǵızstan, Litva, Malayziya, Monako, Niderlandiya, BAÁ, Polsha, Rossiya, Rumıniya, Saudiya Arabstanı, Singapur, Slovakiya, AQSh, Tájikstan, Túrkmenstan, Túrkiya, Franciya, Yaponiya sıyaqlı mámleketler usılardıń qatarına kiredi.
Qatnasıwshılardıń 90 procentten aslamın sırt el kompaniyaları qurap atırǵanı ilajdıń xalıqaralıq abırayın jáne de arttırıp, Ózbekstannıń energetika potencialına bolǵan isenimi hám qızıǵıwshılıǵı artqanın ayqın kórsetip atırǵanın atap ótiw kerek.
Ózbekstan energetika hápteligi tek ǵana tarawdaǵı aldınǵı texnologiyalar hám innovaciyalardı tanıstırıw emes, al xalıqaralıq birge islesiwdi bekkemlew, jańa investiciyalıq joybarlardı ámelge asırıw hám tarawlıq qarım-qatnastı rawajlandırıw ushın da áhmiyetli platformaǵa aylanadı.

ÓzA xabarshısı
Nasiba ZIYoDULLAEVA.
jazıp aldı.