Kóshpes múlk qurılısı menen shuǵıllanatuǵın «Dar Global» hám «Trump Organization» kompaniyaları Dubayda AQSh Prezidenti brendi astında záwlim imarat joybarın iske qosadı, delinedi arnawlı baspasóz xabarlamasında. Bul eki kárxana aldın Saudiya Arabstanı, Oman hám Qatarda da birgeliktegi joybarlardı ámelge asırǵan.

Málimlemede aytılıwınsha, bul Jaqın Shıǵıstaǵı birinshi «Trump International Hotel & Tower» brendi astındaǵı turaq jay hám miymanxana imaratı esaplanadı. Baslama qatnasıwshıları regionnıń uzaq múddetli rawajlanıw potencialına isenedi.
350 metrge sozılatuǵın imarat Dubaydıń «Sheikh Zayed Road» trassası janında boy tikleydi. Komplekste dúnyadaǵı eń biyik jaylasqan ústi ashıq jasalma suw basseyni boladı. Qurılıs jumısların 2031-jıl dekabrde juwmaqlaw rejelestirilgen.

Qaraqalpaqstan xabar agentligi