Ájiniyaz atındaǵı Nókis mámleketlik pedagogikalıq institutında Ózbekstan Ekologiyalıq partiyası Qaraqalpaqstan Respublikası partiya shólkemi Keńesiniń “Ekologiya hám salamatlıq” hayal-qızlar klubı hám Ádillik ministrligi menen birgelikte “Gender teńligi hám hayal-qızlardıń saylawdaǵı ornı” atamasında seminar bolıp ótti.

Seminarǵa institut rektorınıń hayal-qızlar máseleleri boyınsha keńesgóyi, Qaraqalpaqstan Respublikası Ádillik ministrliginiń wákilleri, professor-oqıtıwshılar, “Ekologiya hám salamatlıq” hayal-qızlar klubı Keńesiniń aǵzaları qatnastı.
Atap ótilgenindey, elimizde hayal-qızlardıń huqıqları menen nızamlı máplerin qorǵaw boyınsha ámelge asırılıp atırǵan reformalar, sistemalı ilajlardıń, onda gender teńlikti támiyinlew tarawındaǵı mashqalalardı ilimiy jaqtan úyreniw hám olarǵa sheshim sıpatında ilimiy tiykarlanǵan usınıslardı islep shıǵıw, xalıq arasında gender qádiriyatlardı úgit-násiyatlaw, usı máseleler boyınsha bilimlerin arttırıw tiykarǵı maqset etip belgilengen.
Ózbekstanda gender teńligi hám hayal-qızlardıń siyasiy processlerdegi qatnasıwı barǵan sayın artıp barmaqta. Álbette, bul jaǵday saylaw processlerinde de baqlanbaqta. 2024-jılı ótkerilgen saylawlar nátiyjesinde hayal-qızlardıń úlesi Senatta derlik 27 procentke, Nızamshılıq palatasında 38 procentke, jergilikli Keńeslerde 32,5 procentke jetti.
Oqıw-seminar dawamında berilgen bilim qatnasıwshılardıń gender teńligi jáne usı tarawdaǵı xalıqaralıq standartlar hám aldınǵı tájiriybeler haqqındaǵı túsiniklerin arttıradı. Usınday, oqıw-seminarlar keleshekte hayal-qızlardıń tek ǵana saylaw procesinde emes, al siyasatta da tikkeley qatnasıwın xoshametlew boyınsha keyingi qádemlerdi anıqlawǵa járdem beretuǵınlıǵın atap ótiw orınlı.
Sonday-aq, “Ekologiya hám salamatlıq” hayal-qızlar klubınıń aǵzaları tárepinen ilajda bul baǵdardaǵı úgit-násiyatlaw jumısların kúsheytiw, apa-qarındaslarımızdıń huqıqıy bilim hám sawatlılıǵın arttırıw áhmiyetli ekenligi ayrıqsha atap ótildi.
Tema sheńberindegi bilim hám túsiniklerin bayıtıwǵa xızmet etken seminar qatnasıwshıları ózlerin qızıqtırǵan sorawlarına juwap aldı.

Qaraqalpaqstan xabar agentligi